صدر مملکت کی علماء کرام سے اپنا کردار نبھانے اپیل

?️ 2 مئی 2021

اسلام آباد(سچ خبریں)کورونا وائرس کی روک تھام کے لئے حکومت سے تعاون کے پیش نظر  صدرِ مملکت ڈاکٹر عارف علوی نے مختلف مکاتب فکر کے جید علما کرام سے اپیل کی ہے کہ وہ کورونا ایس او پیز پر عمل کروانے میں اپنا کردار ادا کریں، ان کا کہنا تھا کہ وہ اس کڑے امتحان میں قوم کو نظم و ضبط کا مظاہرہ کرنے کی تلقین کریں۔

تفصیلات کے مطابق صدر مملکت ڈاکٹر عارف علوی نے مختلف مکاتب فکر کے 14علما سے ٹیلی فونک رابطہ کیا، جس میں کرونا کی موجودہ صورت حال اور ایس او پیز پر عمل درآمد کے حوالے سے تفصیلی تبادلہ خیال کیا گیا۔صدر مملکت ڈاکٹرعارف علوی نے مفتی محمد تقی عثمانی، پیر امین الحسنات، پیر نقیب الرحمان، راجہ ناصر عباس، مولانا حنیف جالندھری اور مولانا راضب حسین نعیمی سے بھی گفتگو کی اور اپیل کی کہ وہ کورونا ایس او پیز پرعمل کرانے میں اپنا کردار ادا کریں۔

صدر عارف علوی نے علما کرام سے اپیل کی کہ وہ اپنے حلقے میں موجود لوگوں میں ایس او پیز کی اہمیت کو اجاگر کریں اور احتیاطی تدابیر پر عمل کروانے میں اپنا کردار بھی ادا کریں۔صدر مملکت کا کہنا تھا کہ علما کرام لوگوں کو ماسک پہننے اور وبا کی روک تھام کیلئے حکومت سے تعاون کی تلقین کریں، نمازیوں اور شہریوں کو بتائیں کہ حضورﷺ نے بھی وبا سے بچنے کیلئے احتیاطی تدابیر پر عمل کرنے کی تلقین کی ہے۔

صدارتی ترجمان کے مطابق علما کرام نے بین المذاہب اور بین المکاتب ہم آہنگی کیلئے ڈاکٹرعارف علوی کے کردار کی تعریف بھی کی جبکہ مفتی تقی عثمانی نے انسداد کورونا کیلئے صدرعارف علوی کے کردار کو بھی سراہا ہے۔

دوسری جانب نیشنل کمانڈ اینڈ آپریشن سینٹر (این سی او سی) کی جانب سے جاری ہونے والے اعداد و شمار میں بتایا گیا کہ گزشتہ 24 گھنٹوں کے دوران کورونا کے مزید ایک سو چھیالیس مریض جاں بحق ہوئے جس کے بعد اموات کی مجموعی تعداد بڑھ کر 17 ہزار 957 تک پہنچ گئی۔