شہداء قوم کا اثاثہ ہیں

?️ 15 نومبر 2021

اسلام آباد (سچ خبریں)  تفصیلات کے مطابق وفاقی دارالحکومت اسلام آباد میں میڈیا سے گفتگو کرتے ہوئے وفاقی وزیر داخلہ شیخ رشید نے کہا کہ وزیراعظم عمران خان نے ابھی ترجمانوں کی میٹنگ بلائی ہے، ای وی ایم ہی دھاندلی کو روکنے کا طریقہ ہے، کوئی بھی مسئلہ ہو لوگ ڈی چوک آجاتے ہیں، وزارت داخلہ تمام وزارتوں کی ذمہ دار نہیں ہے۔

شیخ رشید نے کہا کہ شہدا قوم کا اثاثہ ہوتے ہیں، شہدا سے ہی وطن کی مٹی سرسبز ہوتی ہے۔ انہوں نے کہا کہ ملک میں بڑھتے ہوئے جرائم پر قابو پانے کے لیے اقدامات کررہے ہیں، جرائم کو کنٹرول کرنے کی سب سے زیادہ ذمہ داری پولیس پر عائد ہوتی ہے، میں پولیس کی سیاست نہیں کرتا۔

معاشی حالات کی وجہ سے کرائم بھی بڑھ جاتا ہے۔ انہوں نے بتایا کہ اسلام آباد میں دسمبر سے پہلے اپنی فرانزک لیبارٹری کا کام شروع ہوجائے گا۔

میڈیا سے گفتگو کرتے ہوئے شیخ رشید نے کہا کہ پاکستان کو سرحدوں سے نہیں اندر کی سازشوں سے خطرہ ہے، ای وی ایم ہی ایک ذریعہ ہے جس سے انتخابات میں دھاندلی کو روکا جاسکتا ہے، اتحادیوں سے توقع ہے کہ وہ انتخابی اصلاحات کے قانون کے حق میں ووٹ دیں گے۔ اپوزیشن سے متعلق بات کرتے ہوئے شیخ رشید کا کہنا تھا کہ پی ڈی ایم والے اسلام آباد آئیں گے تو احسن طریقے سے معاملے کو دیکھا جائے گا۔

اپوزیشن اتحاد پی ڈی ایم کے احتجاج سے متعلق بات کرتے ہوئے وزیر داخلہ شیخ رشید نے کہا کہ اتنا احتجاج لندن کے ہائیڈ پارک میں نہیں ہوتا جتنا ڈی چوک میں ہوتا ہے، صوبوں کا مسئلہ ہو تو وہ بھی ڈی چوک پہنچ جاتے ہیں۔ انہوں نے کہا کہ پی ڈی ایم قانون کو ہاتھ میں نہیں لے گی تو ہماری طرف سے بھی کوئی رکاوٹ نہیں ہوگی۔