شہباز گل نے ان پر حملہ کرنے والوں کو معاف کردیا

?️ 16 مارچ 2021

لاہور (سچ خبریں) وزیر اعظم عمران خان کے معاون خصوصی ڈاکٹر شہباز گل نے ان  پر حملہ کرنے والوں کو معاف کردیا۔انہوں نے لکھا کہ میں حملہ کرنے والوں کو معاف کرتا ہوں کیوں کہ میں کسی غریب اور نا سمجھ کو جیل میں نہیں دیکھنا چاہتا۔

تفصیلات کے مطابق سماجی رابطوں کی ویب سائٹ ٹوئٹر پر اپنے ایک بیان میں انہوں نے کہا کہ گزشتہ روز عدالت میں مسلم لیگ ن کی قیادت کے ایماء پرمجھ پرحملہ کیا گیا ، جس کے لیے اخلاق سے گرے ہوئے لوگ غریب دیہاڑی دار افراد خصوصاً خواتین کا استعمال کر رہے ہیں۔

انہوں نے لکھا کہ میں حملہ کرنے والوں کو معاف کرتا ہوں کیوں کہ میں کسی غریب اور نا سمجھ کو جیل میں نہیں دیکھنا چاہتا ، پولیس سے گذارش ہے کہ ان کے ساتھ کوئی برا سلوک نہ کیا جائے۔یاد رہے کہ وزیر اعظم عمران خان کے معاون خصوصی شہباز گل کی لاہور ہائیکورٹ میں پیشی کے موقع پر ان پر گندے انڈے پھینک دئیے گئے ، آج لاہور ہائیکورٹ میں ایک انتہائی نا خوشگوار واقع پیش آیا ، معاون خصوصی شہباز گل لاہور ہائیکورٹ پہنچے تو ان پر لیگی کارکن کی جانب سے انڈے پھینکے گئے۔

بتایا گیا ہے کہ لاہور ہائیکورٹ کے احاطے میں شہباز گل کو نہ صرف دو انڈے مارے گئے بلکہ سیاہی بھی پھینکی گئی ، شہباز گل کے ماتھے اور ہاتھ پر سیاہی لگ گئی، وزیراعظم عمران خان کے معاون خصوصی برائے سیاسی روابط شہباز گل کے چہرے پر پھینکی گئی سیاہی زہریلی نکلی، جس سے ان کی آنکھ میں انفیکشن ہو گیا۔

ڈاکٹرزنے بتایا کہ سیاہی میں موجود کیمیکل کی وجہ سے آنکھ میں انفیکشن ہو گیا ہے تاہم علاج کے بعد آنکھ ٹھیک ہو جائے گی، ڈاکٹرزنے شہباز گل کی بائیں آنکھ پر ٹریٹمنٹ کے بعد پٹی لگا دی گئی۔اس پر وزیر اعظم عمران خان کے معاون خصوصی ڈاکٹر شہباز گل نے کہا کہ مجھ پر اپنے کالے کرتوتوں کی سیاہی پھینکویا کچھ اورآپ کو نہیں چھوڑوں گا۔

ان کا کہنا تھا کہ  مریم نواز کو بتا دیں کہ میں کسی سے ڈرنے والا نہیں ، گالی کا جواب گالی سے نہیں دیں گے،آپ کے کارکنوں کو سمجھائیں گے ، میڈیا کے نمائندوں سے گفتگو کرتے ہوئے انہوں نے کہا کہ خاندانی لوگ ہیں ، ایسی حرکت کا جواب اس طرح نہیں دیں گے ، مجھے عدالت بلائے گی تو ضرور آؤں گا،آپ کی طرح بہانے نہیں بناؤں گا۔