شبلی فراز کا اہم بیان، تحریک انصاف کا مقصد نیا پاکستان ہے

?️ 23 مارچ 2021

اسلام آباد(سچ خبریں)وفاقی وزیر اطلاعات و نشریات شبلی فراز کا یوم پاکستان کے موقع پر کہنا ہے کہ تحریک انصاف کا مقصد نیا پاکستان ہے ،ہماری حکومت نہ ڈرتی ہے نہ دبتی ہے، ہمارے پاس وہ لیڈرشپ موجود ہے جیسی قائداعظم کی تھی۔

سینیٹر شبلی فراز نے یوم پاکستان کے موقع پر فوٹوگرافک نمائش سے خطاب کے دوران کہا کہ اس ملک کے لیے ہم نے بہت قربانیاں دی ہیں، قائداعظم نے ایسے سفر اور منزل کا تعین کیا جس کا مقصد قانون اور آئین کی بالادستی والا معاشرہ تھا۔ افواج پاکستان اور پولیس کے اداروں نے ملک میں نظم وضبط قائم کرنے کے لیے بہت کام کیے، ہم نے اس عزم کو دہرانا ہے جس کے لیے ملک بنا تھا۔

سینیٹر شبلی فراز نے کہا ہے کہ یہ ملک بنا تھا پاکستان کی عوام کے لیے جہاں سب کو انصاف مل سکے، ایسا ملک نہ ہو جس میں لوگ قانون کا مذاق اڑائیں، بدقسمتی سے ہمارے ملک میں ایسی روش اپنائی گئی جس نے اخلاقی معیار کو تباہ کردیا۔

انہوں نے مزید کہا کہ آج کرپشن کو کوئی کرپشن نہیں سمجھتا، نوازشریف نے قانون سے فرار اختیار کرلی، جب بھی نوازشریف پر سخت وقت آیا ملک سے بھاگ گئے، مولانا فضل الرحمٰن رینٹ اے کراؤڈ کے کاروبار میں ہیں۔

شبلی فراز کا کہنا تھا کہ براڈشیٹ انکوائری رپورٹ کا جائزہ لیں گے پھر تفصیلات عوام سے شیئر کریں گے، براڈشیٹ انکوائری رپورٹ وزیراعظم کو پیش کردی گئی ہے۔ شبلی فراز نے مزید کہا کہ پچھلے سال سے اس ملک کی سمت درست ہوچکی ہے جو بڑا چور ہوگا،جس کی اربوں کی جائیدادیں ہوں گی اسے چور نہیں کہا جاتا، پوری قوم نے معاشرے کو ٹھیک کرنے میں حصہ لینا ہے۔