سہیل آفریدی و دیگر کیخلاف اشتہاری کی کارروائی، مختلف جگہوں پر نوٹسز چسپاں

?️ 18 دسمبر 2025

اسلام آباد (سچ خبریں) وزیر اعلیٰ خیبرپختونخوا سہیل آفریدی و دیگر کیخلاف اشتہاری کی کارروائی، انسداددہشت گردی عدالت کے احکامات پر مختلف جگہوں پر نوٹسز چسپاں کر دیئے گئے۔

جوڈیشل کمپلیکس میں بھی مختلف مقامات پر طلبی کے حوالے سے نوٹسز لگا دیئے گئے، نوٹسز میں سہیل آفریدی، مینا خان، امجد خان، شفیع اللہ جان، امجد آفریدی کو عدالت میں پیش ہونے کی ہدایت کی گئی ہے۔

انسداد دہشت گردی عدالت کے سیکشن 87 کے حکم نامہ کی روشنی میں نوٹسز آویزاں کئے گئے، جن میں کہا گیا کہ ملزمان عدالتی احکامات کی تعمیل نہیں کر رہے یا روپوش ہیں۔

نوٹسز کے مطابق سہیل آفریدی ،شفیع اللہ ودیگر ملزمان عدالت میں پیش ہوں، ملزمان کی پیشی کے حوالے سے یہ آخری موقع دیا جارہا ہے۔

عدالتی نوٹسز میں کہا گیا ہے کہ سیکشن 87 کی کارروائی کے دوران ملزمان عدالت میں پیش نہ ہوئے تو قانونی کارروائی کی جائے گی۔