سوات: پولیس کی کارروائی میں منشیات اسمگلر ہلاک، پولیس اہلکار شہید

?️ 21 مارچ 2025

سوات: (سچ خبریں) خیبرپختونخوا کے ضلع سوات میں آپریشن کے دوران ایک پولیس اہلکار شہید اور 3 زخمی ہوگئے جبکہ پولیس نے ایک مطلوب منشیات اسمگلر کو ہلاک کردیا جو مبینہ طور پر ایک افسر کے قتل میں بھی ملوث تھا۔

دسمبر 2024 میں سوات کے منگلوار تھانے کے اسٹیشن ہاؤس افسر (ایس ایچ او) رحیم خان مینگورہ شہر میں منشیات کے اسمگلروں کے ساتھ مقابلے کے دوران شہید جبکہ ایک اہلکار زخمی ہوگیا تھا۔ پولیس کی ٹیم دو بدنام زمانہ منشیات اسمگلروں شریف خان عرف شریفے اور احمد زیب کا ان کی سرگرمیوں سے متعلق ایک خفیہ اطلاع پر تعاقب کر رہی تھی۔

سوات کے ڈسٹرکٹ پولیس افسر (ڈی پی او) ناصر محمود کے ترجمان معین علی نے کہا کہ پولیس نے آج پہاڑی علاقے فضاگٹ میں ایس ایچ او رحیم خان کے قتل میں ملوث مجرم کے خلاف انٹیلی جنس کی بنیاد پر آپریشن کیا۔

انہوں نے بتایا کہ ’ملزمان نے اندھا دھند فائرنگ کر کے کانسٹیبل نیاز محمد کو ہلاک کرنے کے ساتھ ساتھ ایڈیشنل سب انسپکٹر (اے ایس آئی) امجد اقبال، کانسٹیبل محمد حسین اور کانسٹیبل سرفراز کو زخمی کر دیا۔‘

معین علی نے مزید تصدیق کی کہ فائرنگ کے تبادلے میں مطلوب منشیات اسمگلر و ایس ایچ او رحیم خان کے قتل کا مرکزی ملزم احمد زیب کو گولی مار کر ہلاک کردیا گیا۔

انہوں نے بتایا کہ ’خفیہ اطلاع پر کارروائی کرتے ہوئے پولیس مشتبہ شخص کی رہائش گاہ پر تلاشی اور گرفتاری کی کارروائی کے لیے پہنچی، پولیس کی اضافی نفری جائے وقوع پر تعینات کی گئی اور فوری طور پر گھر کو گھیرے میں لے لیا۔‘

ڈی پی او کے ترجمان نے بتایا کہ زخمی اہلکاروں کو فوری طور پر سیدو شریف ہسپتال منتقل کیا گیا جہاں ڈاکٹروں نے ان کی حالت خطرے سے باہر ہونے کی تصدیق کی۔ انہوں نے مزید کہا کہ پولیس کی ایک بڑی نفری نے علاقے کو گھیرے میں لے لیا اور واقعے کی مزید تحقیقات شروع کردیں۔

مینگورہ کے ایس ایچ او مجیب عالم نے ڈان نیوز ڈاٹ ٹی وی کو بتایا کہ پولیس کی کارروائی چار گھنٹے تک جاری رہی۔

ان کا مزید کہنا تھا کہ پولیس نے چار منزلہ عمارت کے کمروں کو چیک کیا اور شواہد اکٹھے کیے۔