سابق حکمرانوں کی توجہ صرف ذاتی مفادات پرتھی: عثمان بزدار

?️ 23 اگست 2021

لاہور (سچ خبریں) وزیراعلیٰ عثمان بزدار نے کہا ہے کہ سابق حکمرانوں کی ترجیحات صرف ذاتی نمود و نمائش تھی، انہوں نے صرف ذاتی مفادات پر توجہ دی ،  ہم ذاتی نمائش پر نہیں بلکہ صرف کام پر یقین رکھتے ہیں، ہم نے دعوے کم اور کام زیادہ کئے ہیں۔لوگوں کے مسائل کو ذاتی مسئلہ سمجھ کر حل کرنے کی کوشش کرتا ہوں۔

وزیراعلی پنجاب سے ڈیرہ غازی خان اور دیگر شہروں سے تعلق رکھنے والے وفود نے ملاقات کی۔ عثمان بزدار نے وفود کے مسائل سنے اور ان کے حل کیلئے موقع پر ہی احکامات دیئے۔ وزیراعلی کا کہنا تھا کہ لوگوں کے مسائل کو ذاتی مسئلہ سمجھ کر حل کرتا ہوں، عوام کے مسائل ان کی دہلیز پر حل کرنے کیلئے شہروں کے دورے کر رہا ہوں، ماضی کی حکومت نے پسماندہ اضلاع سے سوتیلی ماں جیسا سلوک کیا۔

عثمان بزدار نے کہا کہ اب پنجاب کے پسماندہ اضلاع ترقی کی دوڑ میں شامل ہوچکے ہیں، اپنے قائد وزیراعظم عمران خان کے ویژن کے تحت وسائل کا رخ پسماندہ اضلاع کی جانب موڑا ہے، ترقی پنجاب کے ہر ضلع کا حق ہے، اب حالات ماضی کی طرح صرف حکمرانوں کے نہیں بلکہ عوام کے حالات بدل رہے ہیں۔

دوسری جانب وزیرِ مملکت فرخ حبیب نے کہا ہے کہ اپوزیشن جماعتوں کا مفاد دھاندلی میں ہے اس لیے انتخابی اصلاحات کو مسترد کر رہی ہیں۔فرخ حبیب نے اپنے بیان میں کہا کہ  پی ڈی ایم سیاسی بے روزگاروں کا ٹولہ ہے، اِن کا شیرازہ بکھر چکا ہے۔وزیر مملکت نے کہا کہ مسلم لیگ ن کے احتساب کے عمل پر اعتراضات بے بنیاد ہیں، منی لانڈرنگ اور کرپشن کرنے والوں کو حساب دینا پڑے گا۔