پاکستان

رانا ثناءاللہ کیخلاف توہین عدالت کی درخواست دائر

19
جولائی

?️ 19 جولائی 2022

اسلام آباد: (سچ خبریں) پاکستان مسلم لیگ ق نے 5 ایم پی ایز اِدھر اُدھر کرنے کے بیان پر وزیر داخلہ رانا ثناءاللہ کے خلاف توہین عدالت کی درخواست دائر کردی۔

تفصیلات کے مطابق اسپیکر پنجاب اسمبلی چوہدری پرویز الہٰی کی جانب سے وزیرداخلہ رانا ثناء اللہ کے خلاف سپریم کورٹ میں توہین عدالت کی درخواست دائر کی گئی ہے ، درخواست میں رانا ثنا اللہ ، وزیر اعلیٰ پنجاب حمزہ شہباز اور مریم اورنگزیب کو فریق بنایا گیا ہے۔
درخواست میں استدعا کی گئی ہے کہ 5 اراکین کے غائب ہونے کے بیان پر رانا ثنااللہ کے خلاف توہین عدالت کی کارروائی کی جائے کیوں کہ رانا ثنا اللہ نے سپریم کورٹ کے یکم جولائی کے حکم کی خلاف ورزی کی ہے ، رانا ثنا اللہ کا دھمکی آمیز بیان توہین عدالت کے زمرے میں آتا ہے ، رانا ثنا اللہ کو سپریم کورٹ کے احکامات پر عملدرآمد کا حکم دیا جائے۔خیال رہے کہ وفاقی وزیر داخلہ رانا ثنا اللہ خان نے کہا تھا کہ وزارت اعلیٰ کے انتخاب میں پانچ ووٹو ں کا فرق ہے اگر اس دن پانچ لوگ اِدھر اُدھر ہو گئے تو اس کے بعد پرویز الٰہی وزارت اعلیٰ کو ڈھونڈتے پھریں گے ، 17جولائی کا جو ضمنی انتخاب تھا اس میں پی ٹی آئی نے 15نشستوں پرکامیابی حاصل کی ،پانچ نشستوں پر آزدا داو رمسلم لیگ (ن) نے کامیابی حاصل کی لیکن ایک پاگل شخص جیت کر بھی یہ کہہ رہا ہے کہ دھاندلی ہوئی ہے اور وہ اس کا گھٹیا پن ہے چھپائے نہیں چھپتا ، ہر معاملے میں وہ اتنی بے شرمی اور گھٹیا پن کا مظاہرہ کرتا ہے کہ اس کیلئے الفاظ کم پڑ جاتے ہیں ۔

وزیر داخلہ کے اس بیان پر ردعمل دیتے ہوئے سربراہ عوامی مسلم لیگ شیخ رشید احمد نے کہا کہ رانا ثناء اللہ کی 5 ایم پی ایز کو غائب کرنے کی دھمکی سیاسی غنڈہ گردی کا ثبوت ہے ، ممبروں کا اٹھایا جانا اور خرید و فروخت جمہوریت کے تابوت میں آخری کیل ٹھونک دے گی ، سیاسی استحکام نہ آیا تو جھاڑو پھر جائے گا۔

Short Link

Copied