دہشت گردوں کو ہدایت فراہم کرنے کے بارے  میں رینجرز کا اہم انکشاف

?️ 11 مارچ 2021

کراچی(سچ خبریں) محکمہ انسداد دہشتگردی اور سندھ رینجرز نے دہشت گردوں کو ہدایت فراہم کرنے کے بارے میں اہم انکشاف کیا ہے کہ ایم کیو ایم لندن کی رابطہ کمیٹی کی رکن کہکشاں حیدردہشت گردوں کو ہدایت فراہم کرتی تھیں، مبینہ ٹارگٹ کلرز سے ہونے والی گفتگو میڈیا کے سامنے پیش کر دی ہے۔

تفصیلات کے مطابق ڈی آئی جی کاؤنٹر ٹیررزم ڈیپارٹمنٹ عمر شاہد ، ایس ایس پی عارف عزیز اور سندھ رینجرز کے کرنل شبیر نے کراچی میں مشترکہ پریس کانفرنس کی جس میں بتایا گیا کہ امریکا میں مقیم ایم کیو ایم لندن کی کہکشاں حیدر کراچی میں ٹارگٹ کلنگ ٹیم کو ان ڈائریکٹ ہیڈ کر رہی ہیں۔

سندھ رینجرز کے کرنل شبیر کا کہناتھا کہ کراچی میں ٹارگٹ کلرز کام کر رہے ہیں ان کو یہ خاتون لیڈ کررہی ہیں ، کہکشاں حیدر پر پہلے ہی ایک مقدمہ درج ہے جبکہ کہکشاں حیدر بیرون ملک بیٹھ کر ملک میں افراتفری پھیلانے کی کوشش کر رہی ہیں ، ہمیں آپریشن میں یہ معلوم ہوا کہ واردات ہوتی ہے اور بینک میں رقم منتقل کردی جاتی ہے۔

کرنل شبیر نے بتایا کہ رینجرز نے جن کو گرفتار کیا تھا ان کو عمر قید کی سزا مل چکی ہے اور وہ لوگ بھی کہکشاں نامی خاتون کا نام لے چکے تھے۔ڈی آئی جی سی ٹی ڈی عمر شاہد کا کہنا تھا  کہ کراچی کی  ٹارگٹ کلنگ میں امریکا میں مقیم ایم کیو ایم لندن کی کہکشاں حیدر مرکزی کردار نکلی ہیں، رینجرز اور سی ٹی ڈی نے ایک مشترکہ آپریشن کیا ہے، 2017 ء میں رینجرز نے ایم کیو ایم لندن کی ٹارگٹ کلرز کی ٹیم پکڑی تھی،ایم کیو ایم لندن کا ہمیشہ سے کراچی میں دہشت گردی پھیلانے کا مقصد رہا ہے۔

دوسری جانب ڈی آئی جی سی ٹی ڈی عمر شاہد نے کہکشاں نامی خاتون کی کال ریکارڈنگ کو میڈیا کے سامنے پیش کی جس میں خاتون ٹارگٹ کلر سے کام کے بدلے پیسوں کی بات کر رہی ہیں،کال ریکارڈنگ میں خاتون ٹارگٹ کلر سے ٹارگٹ کے حوالے سے گفتگو کر رہی ہیں۔