دنیا کو ملکر فلسطین، کشمیر میں جاری مظالم اور بربریت کا خاتمہ کرنا ہوگا، اسحٰق ڈار

?️ 1 جنوری 2025

اسلام آباد: (سچ خبریں) نائب وزیر اعظم اور وزیر خارجہ اسحٰق ڈار نے فلسطین اور کشمیر میں جاری مظالم کو اقوام متحدہ کی ساکھ پر سوالیہ نشان قرار دے دیا۔

اسلام آباد میں سفرا کانفرنس سے خطاب کرتے ہوئے وزیر خارجہ اسحٰق ڈار نے کہا کہ فلسطینی مسلمانوں کی منظم نسل کشی، اسرائیل کے جنگی جرائم اور کشمیر میں ظلم و بربریت کا سلسلہ جاری ہے، دنیا کو مل کر اسے ختم کرنا ہوگا، فلسطین اور کشمیر میں جاری مظالم اقوام متحدہ کی ساکھ پر سوالیہ نشان ہے۔

انہوں نے کہا ہے کہ دنیا کو متعدد چیلنجز کا سامنا ہے، پاکستان عالمی امن اور سیکیورٹی کے لیے اپنا کردار ادا کرتا رہے گا، سلامتی کونسل کی غیر مستقل رکنیت پاکستان کے لیے اعزاز ہے۔

اسحٰق ڈار نے تقریب میں شریک سفرا کو سال نو کی مبارک باد پیش کی اور کہا کہ پاکستان اقوام متحدہ کے چارٹر کی پاسداری پر عمل کرنے کے لیے پر عزم ہے۔

انہوں نے کہا کہ اقوام متحدہ کے رکن ممالک کی جانب سے پاکستان کو سلامتی کونسل کا غیر مستقل رکن منتخب کرنے پر شکر گزار ہیں، ہم آپ کے اعتماد پر پورا اتریں گے، پاکستان کو اقوام متحدہ میں غیر مستقل رکن بننے کا اعزاز ایسے وقت میں ملا ہے، جب دنیا میں متعدد تنازعات چل رہے ہیں۔

ان کا کہنا تھا کہ دہشت گردی، انتہا پسندی، اسلاموفوبیا اور عدم برداشت جیسے مسائل بڑے چیلنج کی صورت میں سامنے آئے ہیں، پاکستان دہشت گردی کو جڑ سے اکھاڑ پھینکنے اور قیام امن کے لیے پرعزم ہے۔

نائب وزیراعظم نے کہا کہ پاکستان دنیا کو در پیش چیلنجز سے نبرد آزما ہونے کے لیے اپنا بھرپور کردار ادا کرے گا، امید ہے کہ تمام دوست ممالک اور عالمی برادری اس ضمن میں اپنا اپنا کردار بھی جاری رکھیں گے۔