حکومت کے خلاف تحریک عدم اعتمادسے متعلق وزیراعلی سندھ کا اہم بیان

?️ 28 فروری 2022

اسلام آباد (سچ خبریں) وزیراعلیٰ سندھ مراد علی شاہ نے حکومت کے خلاف تحریک عدم اعتماد سے متعلق کہا ہے کہ   اپوزیشن کی جانب سے ایک آئینی طریقہ کار کا اعلان ہو چکا ہے اور اب تحریک عدم اعتماد آئے گی۔ مجھے پتہ چلا ہے کہ وزیراعظم عمران خان آج قوم سے خطاب کررہے ہیں تاہم عوام یہ سب پہلے سن چکی ہے کہ کسی کو نہیں چھوڑوں گا اورکسی کو نہیں بخشوں گا۔

تفصیلات کے مطابق آج صبح صبح اسلام آباد کی احتساب عدالت میں نوری آباد پاور پلانٹ ریفرنس میں وزیراعلیٰ سندھ مراد علی شاہ پیش ہوئے۔عدالت کے باہر صحافیوں سے بات کرتے ہوئے وزیراعلٰی سندھ سید مراد علی شاہ نے کہا کہ اس کیس میں ایک سال سے تاریخیں مل رہی ہیں اور اب ایک اور تاریخ مل گئی ہے،عدالت نے 16 مارچ کو طلب کیا ہے تاہم 16 مارچ سے قبل ہی اسلام آباد پہنچ رہے ہیں۔

وزیراعظم کے خطاب سے متعلق انہوں نے کہا کہ مجھے پتہ چلا ہے کہ وزیراعظم عمران خان آج قوم سے خطاب کررہے ہیں تاہم عوام یہ سب پہلے سن چکی ہے کہ کسی کو نہیں چھوڑوں گا اورکسی کو نہیں بخشوں گا۔انہوں نے کہا کہ عمران خان کے لیے اپنے کرتوت بخشوانے کا وقت آگیا ہے اوراب عوام ان کو نہیں چھوڑے گی۔ اُن کا کہنا تھا کہ پیپلزپارٹی کا لانگ مارچ ملک میں جاری مہنگائی، بے روزگاری اور وعدوں کی عدم تکمیل کے خلاف ہے اور چئیرمین بلاول بھٹواپنا پیغام لے کرلوگوں تک جارہے ہیں۔

لانگ مارچ کے حوالے سے مراد علی شاہ نے کہا کہ جہاں جہاں سے پیپلزپارٹی کے قافلے گزر رہے ہیں،لوگ بڑی تعداد میں رہنماؤں کی آوازسن کر مارچ میں شامل ہورہے ہیں جبکہ اسلام آباد پہنچنے تک پورے پاکستان کےعوام اس مارچ میں شامل ہوجائیں گے، لانگ مارچ پورے ملک کی عوام آواز ہے ۔

وزیراعلیٰ سندھ سید مراد علی شاہ نے میڈیا سے گفتگو کرتے ہوئے کہا کہ اپوزیشن کی جانب سے ایک آئینی طریقہ کار کا اعلان ہو چکا ہے اور تحریک عدم اعتماد آئے گی،عمران خان کی حکومت کو اب گھر جانا ہوگا اورحکومت کو احساس دلائیں گے کہ عوام کی آواز سن لے۔ انہوں نے یقین ظاہر کیا کہ منتحب نمائندے عوام کی آواز بنیں گے۔