حکومت کیجانب سے عمران خان کو پے رول یا شفٹ کرنے کی کوئی آفر نہیں۔ بیرسٹر عقیل

?️ 28 اکتوبر 2025

اسلام آباد (سچ خبریں) مسلم لیگ ن کے رہنما بیرسٹر عقیل ملک نے کہا ہے کہ حکومت کی جانب سے بانی پی ٹی آئی کو پے رول یا شفٹ کرنے کی کوئی آفر نہیں ہے۔

مسلم لیگ ن کے رہنما بیرسٹر عقیل ملک نے کہا کہ صوبے کے وزیراعلی پر بڑی ذمہ داری عائد ہوتی ہے۔ اور دہشتگردی کے حوالے سے سب سے زیادہ متاثر صوبہ خیبر پختونخوا ہے۔ انہوں نے کہا کہ خیبر پختونخوا کے عوام کو لاوارث چھوڑ دیا گیا ہے۔ اور کابینہ بننے میں تاخیر ہوگی تو آرٹیکل 234 کا اطلاق ہوسکتا ہے۔

بانی پی ٹی آئی عمران خان سے ملاقات کے حوالے سے گفتگو کرتے ہوئے بیرسٹر عقیل ملک نے کہا کہ جیل قوانین کے مطابق صرف فیملی ممبرز اور وکلا کی ملاقات ہوسکتی ہے۔ جبکہ بانی پی ٹی آئی کو 190 ملین پاؤنڈ کیس میں 14 سال قید کی سزا ہوئی ہے۔ اور توشہ خانہ ون میں بانی پی ٹی آئی کی سزا معطل ہوئی۔

انہوں نے کہا کہ سپریم کورٹ نے 9 مئی کے 8 مقدمات میں بانی پی ٹی آئی کو ضمانت دی ہے۔ حکومت کی طرف سے بانی پی ٹی آئی کو نہ کوئی پے رول کی آفر ہے اور نہ کہیں شفٹ کرنے کی۔ اور اگر پے رول پر درخواست دیں گے تو جیل قوانین کے مطابق دیکھا جائے گا۔

بیرسٹر عقیل ملک نے کہا کہ حکومت یہ نہیں کہہ سکتی کہ ہم آپ کو پے رول پر رہا کر دیں گے۔ تاہم دونوں صورتوں میں بانی پی ٹی آئی کو درخواست دینی ہوگی۔