حکومت نے لوٹ مار کلچر کو ختم کر دیا: عثمان بزدار

🗓️ 5 جولائی 2021

لاہور (سچ خبریں) وزیر اعلیٰ پنجاب سردار عثمان بزدار کا کہنا ہے کہ حکومت نے لوٹ مار کلچر کو ختم کر دیا اب لوٹ مار کی سیاست ختم ہو چکی ہے، عوام کی خدمت کرنے کے لئے آئے ہیں،  ترقی اور خوشحالی کا سفر جاری رہے گا ، شفاف پاکستان کی راہ میں آنے والوں کا کوئی مستقبل ہے نہ ہو گا۔

عثمان بزدار نے اپنے ایک بیان میں کہا ہے کہ الزامات کی سیاست پر نہ یقین ہے نہ کرتے ہیں، ہم صرف عوام کی خدمات کے لیے آئےہیں، خدمت کر رہے ہیں اور کرتے رہیں گے۔وزیراعلیٰ پنجاب عثمان بزدار نے کہا ہے کہ ترقی وخوشحالی کے سفر کو کوئی نہیں روک سکتا۔

اس سے قبل اک بیان میں وزیراعلیٰ پنجاب عثمان بزدار کا کہنا تھا کہ  ماضی میں قومی وسائل بے دردی سے لوٹے گئے، پاکستان میں ملک لوٹنے والوں کی سیاست اب ختم ہوچکی ہے۔انہوں نے کہا کہ حزب اختلاف کو سمجھنا ہوگا کہ حکومت نے لوٹ مار کے کلچر کو دفن کردیا ہے۔

دوسری جانب معاون خصوصی اطلاعات پنجاب ڈاکٹر فردوس عاشق اعوان کا کہنا ہے کہ دربدر بھٹکتی ٹوٹی پھوٹی پی ڈی ایم گھسے پٹے بیانیے کے ساتھ پھر سے پتلی تماشا کر رہی ہے، پی ڈی ایم کے مسترد شدہ کردار اپنی دم توڑتی انتشارانہ سیاست سے خود خوفزدہ ہیں۔

ڈاکٹر فردوس عاشق اعوان نے سماجی رابطے کی ویب سائٹ ٹوئٹر پر اپنے ایک بیان میں کہا ہے کہ مولانا کی قیادت میں عبرتناک رسوائی سے کرپٹ ٹولے نے کچھ نہ سیکھا۔فردوس عاشق اعوان نے کہا ہے کہ پیپلزپارٹی اور اے این پی سمندر برد ہوتی پی ڈی ایم کشتی سے چھلانگ لگا چکیں ہیں۔انہوں نے اپنی ٹوئٹ میں مزید لکھا ہے کہ اقتدار کا حلوہ پی ڈی ایم چمچوں کو میسر نہ ہوگا۔