حکومتی اور دفاعی اداروں پر بھارتی سائبر حملوں کا خدشہ، ایڈوائزری جاری

?️ 10 جولائی 2025

اسلام آباد: (سچ خبریں) حکومتی اور دفاعی اداروں پر بھارتی سائبر حملوں کے خدشے کے پیش نظر ایڈوائزری جاری کردی گئی۔ میڈیا رپورٹس کے مطابق کابینہ ڈویژن کا کہنا ہے کہ بھارتی ہیکرز پہلگام واقعے کی آڑ میں پاکستان کے سرکاری اور دفاعی اداروں کے سسٹمز کو نشانہ بنانے کی کوشش کر رہے ہیں، اس سلسلے میں ایک خصوصی سائبر سکیورٹی ایڈوائزری جاری کی گئی ہے جس میں حکومتی سوشل میڈیا اکاؤنٹس اور ڈیجیٹل پلیٹ فارمز پر سائبر حملوں کا خدشہ ظاہر کیا گیا ہے۔

ایڈوائزری میں کہا گیا ہے کہ بھارتی ہیکرز مشکوک ای میلز، واٹس ایپ پیغامات اور دیگر ذرائع سے وائرس پھیلانے کی کوشش کر رہے ہیں، ان پیغامات میں عام طور پر "پہلگام واقعہ” کے عنوان سے میلویئر وائرس والی فائلز منسلک کی جاتی ہیں، جو کھولنے پر ڈیوائس میں موجود خفیہ ڈیٹا، تصاویر اور معلومات چوری کرنے کی صلاحیت رکھتی ہیں، ایڈوائزری میں تمام سرکاری اداروں کو سخت احتیاط برتنے کی ہدایت کی گئی ہے۔

حکام کا ایڈوائزری میں کہنا ہے کہ نامعلوم ذرائع سے موصول ہونے والی ای میلز کو نہ کھولا جائے اور انہیں نظر انداز کیا جائے، کسی بھی فائل یا اٹیچمنٹ کو کھولنے سے قبل اسے مستند اینٹی وائرس سے سکین کیا جائے، مشکوک ای میلز یا پیغامات کی فوری اطلاع متعلقہ ادارے کے آئی ٹی ایڈمن کو دی جائے، ہیکرز کا مقصد حساس حکومتی اور دفاعی معلومات تک رسائی حاصل کرنا ہے اور ممکنہ طور پر انہیں بھارت میں سائبر جاسوسی نیٹ ورک سے سپورٹ حاصل ہے، تمام وفاقی و صوبائی اداروں کو تنبیہ کی جاتی ہے کہ اپنے ڈیجیٹل سکیورٹی پروٹوکول کو اپ ڈیٹ کریں، فائر والز اور اینٹی وائرس سسٹمز کو فعال رکھیں اور ملازمین کو ان حملوں سے محفوظ رہنے کی تربیت فراہم کریں۔