جیت جنون اور جذبے کی ہوگی فواد چوہدری کی پیشین گوئی

?️ 24 اکتوبر 2021

اسلام آباد (سچ خبریں) وفاقی وزیر فواد چوہدری نے پاک بھارت میچ سے متعلق کہا ہے کہ جیت جنون اور جذبے کی ہوگی، کھلاڑیوں کے پاس نیا سپراسٹار بننے کا موقع ہے۔ آج شام 7 بجے ٹی ٹوئنٹی ورلڈ کپ 2021 کا سب سے بڑا مقابلہ ہونے جارہا ہےجس میں پاکستان اور بھارت کے درمیان کرکٹ میچ ہونے جا رہا ہے۔

وفاقی وزیر اطلاعات فواد چوہدری نے سماجی رابطے کی ویب سائٹ ٹوئٹر پر جاری اپنے پیغام میں کہا کہ میں ’میں میچ پر جانے کی تیاری کررہا ہوں، ان شاء اللہ جیت جنون اور جذبے کی ہوگی، پاکستان کی ہوگی‘۔

ان کا کہنا تھا کہ کھلاڑیوں کے پاس پاکستان کا نیا سپر اسٹار بننے کا موقع ہے، پاکستان کا ہر شہری اس میچ کو لے کر پرجوش ہے۔خیال رہے کہ آج شام 7 بجے ٹی ٹوئنٹی ورلڈ کپ 2021 کا سب سے بڑا ٹاکرا ہونے جارہا ہے، جس میں روایتی حریف پاکستان اور بھارت آمنے سامنے ہوں گے۔

قومی ٹیم کے کپتان بابر اعظم بھارت کے خلاف اپنے 12 رکنی اسکواڈ کا اعلان بھی کرچکے ہیں۔آئی سی سی ٹی 20 ورلڈ کپ 2021 میں بھارت کے خلاف میچ کے لیے پاکستان کی 12 رکنی ٹیم کا اعلان کیا جاچکا ہے، ٹیم کے کپتان بابر اعظم ہوں گے جبکہ محمد رضوان، فخر زمان، شعیب ملک، محمد حفیظ، عماد وسیم، شاہین آفریدی،حسن علی،حارث روؤف، شاداب خان، آصف علی اور حیدر علی ٹیم میں شامل ہوں گے۔