بورڈ آف پیس میں پاکستان کی شمولیت کا فیصلہ مسترد کرتے ہیں۔ حافظ نعیم

?️ 21 جنوری 2026

کراچی (سچ خبریں) امیر جماعت اسلامی حافظ نعیم الرحمان نے کہا ہے کہ کہ ڈونلڈ ٹرمپ کے بورڈ آف پیس میں پاکستان کی شمولیت کے حکومتی فیصلے کو مسترد کرتے ہیں۔

سماجی رابطے کی ویب سائٹس ’ ایکس ‘پر اپنے پیغام میں حافظ نعیم الرحمان کا کہنا تھا کہ ٹرمپ کا بورڈ آف پیس نو آبادیاتی نظام کی نئی شکل ہے، بورڈ آف پیس میں عراق کو تباہ کرنے والے ٹونی بلیئر جیسے مجرم موجود ہیں، بورڈ آف پیس فلسطینیوں کے وسائل اور زمینوں پر قبضے کا نیا نظام ہے۔

انہوں نے کہا کہ تعمیر نو کے نام پر غزہ پر امریکی قبضہ ناقابل قبول ہے، پاکستانی وزارت خارجہ کا یہ موقف کہ پاکستان نے سلامتی کونسل کی قرارداد کے تحت غزہ امن منصوبے کی حمایت کا اعلان کیا جو حقائق کے برعکس ہے۔

امیر جماعت اسلامی کا مزید کہنا تھا کہ خود ٹرمپ کہہ چکا ہے کہ اس کا بورڈ آف پیس ایک دن اقوام متحدہ کی جگہ لے سکتا ہے، ٹرمپ کے اس مؤقف کے بعد پاکستان کا بورڈ میں شمولیت کا کیا جواز؟ ہم ایک بار پھر بہت واضح انداز میں کہتے ہیں پاکستان کی فوج کسی صورت بھی غزہ نہیں جانی چاہیے۔