ایک ناحق اور بے بنیاد کیس کا خاتمہ ہوگیا، بیرسٹر گوہر کا سائفر کیس کے فیصلے پر تبصرہ

?️ 3 جون 2024

اسلام آباد: (سچ خبریں) پی ٹی آئی کے چیئرمین بیرسٹر گوہر نے سائفر کیس کے فیصلے پر کہا ہے کہ ایک ناحق اور بے بنیاد کیس کا خاتمہ ہوگیا ہے۔

اسلام آباد ہائیکورٹ کے باہر میڈیا سے گفتگو کرتے ہوئے بیرسٹر گوہر نے کہا کہ آج انصاف کی جیت ہوئی ہے، آج عوام نے دیکھا کہ انصاف کا علم بلند ہوا ہے، آج پاکستان کے 25 کروڑ عوام کے لیے خوشی کا دن ہے کیوں کہ آج ایک ناحق اور بے بنیاد کیس کا خاتمہ ہوگیا ہے، بہت جلد سابق چیئرمین پی ٹی آئی کے دیگر کیسز بھی ختم ہوں گے اور عمران خان بہت جلد جیل سے باہر ہوں گے۔

بتایا جارہا ہے کہ اسلام آباد ہائیکورٹ نے سائفر کیس میں سزا کے خلاف پاکستان تحریک انصاف کے قائد عمران خان اور شاہ محمود قریشی کی اپیلیں منظور کرتے ہوئے ٹرائل کورٹ کا فیصلہ کالعدم قرار دے دیا، عدالت نے سابق وزیراعظم اور سابق وزیر خارجہ کی سزائیں ختم کردیں اور انہیں مقدمے سے بری کردیا۔

 اسلام آباد ہائیکورٹ میں سابق وزیراعظم عمران خان اور سابق وزیر خارجہ شاہ محمود قریشی کی سائفر کیس میں سزاؤں کے خلاف اپیلوں پر سماعت ہوئی جہاں چیف جسٹس عامر فاروق اور جسٹس میاں گل حسن اورنگزیب نے سماعت کا آغاز کیا تو ایف آئی اے پراسیکیوٹر ذوالفقار نقوی غیر حاضر تھے، ان کے معاون وکیل نے بتایا کہ ’کچھ وقت دے دیں بیس منٹ تک آجائیں گے‘، عدالت نے کہا کہ ’ہم نے ریگولر ڈویژن بنچ کینسل کیا تاکہ یہ کیس سن سکیں، ہم صرف آپ کے لئے بیٹھے رہے ہیں اور کوئی کام نہیں، ہم نے پہلے کہا تھا 11 بجے ہم نے ٹائم کا بتا دیا تھا، اس کیس کی وجہ سے ریگولر ڈی بی کینسل کی ہے اور سرکاری وکلاء نہیں ہیں، کیا حامد علی شاہ صاحب نے وکالت نامہ واپس لے لیا ہے؟‘، اس پر اسسٹنٹ اٹارنی جنرل نے بتایا کہ ’حامد علی شاہ سے ابھی بات ہوئی وہ والدہ کے پاس معروف ہسپتال میں ہیں، سلمان صفدر بے شک دلائل کو آغاز کر دیں‘۔