اپوزیشن عدم اعتماد کی تحریک میں ناکام ہوئی تو کہہ دے گی تھرڈ ایمپائر آگیا:شیخ رشید

?️ 7 مارچ 2022

اسلام آباد(سچ خبریں)عدم اعتماد سے متعلق کوئی انہونی ہوئی تو عمران خان مزید سرگرم ہوں گے،وزیراعظم کو اندر سے ایک ووٹ دلوا دوں گا‘ عمران خان ان سب کو ایک ہی ٹوکرے میں بند کردیں گے‘ اپوزیشن عدم اعتماد کی تحریک میں ناکام ہوئی تو کہہ دے گی تھرڈ ایمپائر آگیا۔ سارا مہینہ خبروں کی گہما گہمی ہوگی، جیلوں سےبچنےوالےجلدقانون کےدائرےمیں ہوں گے ، عمران خان کے لیے یہ تحریک اطمینان ہوگی۔وفاقی وزیر داخلہ شیخ رشید کی گفتگو

تفصیلات کے مطابق انہوں نے کہا کہ اپوزیشن کہہ رہی ہے ایمپائر نیوٹرل ہے جو اچھی ہے ، ہمیں کسی مارچ سے کوئی مسئلہ نہیں ، مناسب جگہ کا انتخاب کریں ، 22،23اور 24مارچ کو مقامی تعطیل ہوگی ، 23 مارچ کو تاریخی پریڈ ہوگی ، 23مارچ کو فلائنگ مارچ ہوگا،جلد جے 12 بھی آئے گا ، 22 سے 24 مارچ تک وزرائے خارجہ کانفرنس ہوگی جس دوران تعطیل ہوگی ، 25 یا 26 مارچ کو عدم اعتماد ہوگی ،172 لوگوں کو آپ نے لانا ہے ، عمران خان کے خلاف عدم اعتماد ناکام ہوگی ، عمران خان کو اندر سے ایک ووٹ دلوادوں گا ، عمران خان ان سب کو ایک ہی ٹوکرے میں بند کردیں گے ۔

وزیر داخلہ نے کہا کہ دنیا میں عالمی جنگ کے خطرات ہیں اپوزیشن کیا کررہی ہے؟ ہم لانگ مارچ میں رکاوٹیں پیدا نہیں کریں گے ، عمران خان تمام مشکلات سے باہر نکلیں گے ، عدم اعتماد کی تحریک سے متعلق کوئی انہونی ہوئی تو عمران خان مزید سرگرم ہوں گے ، اپوزیشن والے بتائیں آپ ملک کو کس طرح چلائیں گے ؟ اپوزیشن میں اتنی عقل نہیں کہ وہ حالات کے تقاضوں کو سمجھے ، ملک زلزلے سیلاب سے نہیں انتشار سے تباہ ہوتے ہیں ، پہلی بار ملک میں ملکی خارجہ پالیسی بنی ، عمران خان نے ملک میں آزاد خارجہ پالیسی کی بنیاد رکھی ہے ۔

وزیر داخلہ نے کہا کہ میری ذاتی رائے ہے کہ بات چیت کے لیے دروازے ہمیشہ کھلے ہیں ، پی ٹی آئی، اور ن لیگ کا پنجاب کے الیکشن میں مقابلہ ہوگا ، نواز شریف جس سے ملاقاتیں کرلیں کچھ نہیں ہوگا ۔