ان 90 دنوں میں ہم اپنے عروج کو پہنچ کر آر یا پار کریں گے، علی امین گنڈاپور

?️ 13 جولائی 2025

لاہور: (سچ خبریں) وزیراعلیٰ خیبرپختونخواہ علی امین گنڈاپور کا کہنا ہے کہ نو مئی کے بعد ہماری پارٹی کے خلاف سب کچھ کیا لیکن 8 فروری کو عوام نے جواب دیا، اب عمران خان کے خلاف کیسز اس لیے نہیں چلائے جا رہے کہ ان کیسز میں ہے ہی کچھ نہیں۔

لاہور میں اپوزیشن لیڈر پنجاب اسمبلی ملک احمد بچھر اور سیکریٹری جنرل تحریک انصاف سلمان اکرم راجہ کے ہمراہ پریس کانفرنس کرتے ہوئے انہوں نے کہا کہ پاکستان میں سب سے زیادہ تحریکیں عمران خان نے چلائی ہیں آج بھی عمران خان حقیقی آزادی اور آئن قانون کی بالادستی کی جنگ لڑ رہا ہے، عمران خان نے دو ٹوک بتایا ہوا ہے کہ فیصلہ سازوں کے ساتھ ہی مذاکرات کروں گا، ان کو ساتھ بیٹھانا ہے بیٹھا لیں ہمیں کوئی اعتراض نہیں۔

وزیراعلیٰ خیبرپختونخواہ کہتے ہیں کہ نو مئی کے بعد ہمارے اوپر تشدد کیا گیا ظلم کیا گیا 8 فروری کو قوم نے حساب لیا تو انہوں نے مینڈیٹ چوری کر لیا، اس کے بعد سے اب تک ہمارے اوپر سختیاں ہیں، عدالتوں کے دروازے بند اور عمران خان کے کیسوں کی شنوائی نہیں ہو رہی، عمران خان نے ہمیشہ تبدیلی کے حوالے سے 90 دن کا وقت دیا، 90 دن کل رات سے شروع ہوگئے ہیں، 90 دن کی ڈیڈ لائن ہمارے اپنے لیے ہے، اس کے بعد فیصلہ کریں گے کہ کیا ہم نے مزید سیاست کرنی ہے یا نہیں، ان 90 دنوں میں ہم اپنے عروج کو پہنچ کر آر یا پار کریں گے ، پھر ہم رہیں یا نہ رہیں۔

انہوں نے کہا کہ ہمارے فیصلے کا اختیار صرف عمران خان کے پاس ہے، آئیں بیٹھیں دلائل سے بات کریں اور ثابت کریں اگر ہم نے ملک کے خلاف سازش کی ہے تو مجھے چوک میں پھانسی دے دیں لیکن پاکستان کے موجودہ حالات کے ذمہ دار آپ ہیں آپ کو جواب دینا پڑے گا آپ جواب دہ ہیں، عوام کے لیے اب دو ہی راستے ہیں، اگر غلام بننا ہے تو پھر اس نظام خو چلنے دو ورنہ پھر نکل آؤ ہمیں جوائن کرو اور اپنے بچوں کی آزادی کیلئے لڑو۔