انٹر بینک میں ڈالر کی قدر میں کمی، 219 روپے 30 پیسے کا ہوگیا

?️ 25 اکتوبر 2022

اسلام آباد:(سچ خبریں) انٹر بینک مارکیٹ میں امریکی ڈالر کی قدر میں ایک روپے کی کمی دیکھی گئی جس کے بعد اس کی قیمت 219 روپے 30 پیسے ہوگئی۔

ایکسچینج کمپنیز ایسوسی ایشن آف پاکستان (ای سی ای پی) کے جنرل سیکریٹری ظفر پراچا نے کہا کہ عالمی مالیاتی اداروں کی جانب سے امداد ملنے امپورٹ بل اور کرنٹ خسارے میں کمی کی وجہ سے ڈالر نیچے آنا شروع ہوگیا ہے۔ انہوں نے امید ظاہر کی کہ دوست ممالک سے بھی آئندہ ماہ تک 4 ارب ڈالر مل جائیں گے جس سے روپیہ مزید مضبوط ہوگا۔

ظفر پراچا نے توقع ظاہر کی کہ ڈالر کی قیمت مستقبل میں 200 روپے سے بھی نیچے آسکتی ہے۔ انہوں نے کہا کہ گزشتہ دنوں ڈالر کی قیمت میں جو اضافہ ہوا وہ درآمدات کی ادائیگیوں کا دباؤ تھا، اس کے علاوہ وزیر خزانہ اسحٰق ڈار فرانس بھی جارہے جہاں سے اچھی خبریں آنے کی امید ہے۔

مالیاتی اعداد و شمار اور تجزیاتی پورٹل میٹس گلوبل کے ڈائریکٹر سعد بن نصیر نے کہا کہ ایشیائی ترقیاتی بینک (اے ڈی بی) سے ڈیڑھ ارب ڈالر ملنے کے معاہدے اور وزیراعظم کے چین کے متوقع دورے میں بھی قرضوں کی ری شیڈولنگ کے ساتھ نئے منصوبے پر معاہدے متوقع ہیں جس کی وجہ سے ڈالر کی قیمت میں کمی کا سلسلہ جاری رہ سکتا ہے۔

خیال رہے کہ ایک روز قبل ایشیائی ترقیاتی بینک نے پاکستان کے بجٹ کو سپورٹ کرنے اور تباہ کن سیلاب کے بعد متاثرین کی بحالی اور تعمیر نو کے لیے ایک ارب 50 کروڑ ڈالر کی فنانسنگ معاہدے پر دستخط کردیے تھے۔

دوسری جانب چئیرمین فاریکس ایسوسی ایشن پاکستان (ایف اے پی) ملک بوستان کا کہنا تھا کہ وزیراعظم کے دورہ سعودی عرب کے دوران 12 ارب ڈالر کی سرمایہ کاری متوقع ہے جو آئل ریفائنری سمیت دیگر شعبوں میں ہو گی۔

بات کو جاری رکھتے ہوئے انہوں نے کہا کہ چین سے بھی سی پیک کے منصوبوں کی مد میں 12 ارب ڈالر کی سرمایہ کاری کی امید ہے جبکہ اے ڈی بی پی سے بھی آئندہ ماہ رقم مل جائے گی جس کا مثبت اثر روپے کو مضبوط اور ڈالر کی قیمت کو کم کرے گا۔