اسد عمر نے پارٹی میں گروپ بندی کا تاثرمسترد کر دیا

?️ 15 فروری 2022

اسلام آباد (سچ خبریں) وفاقی وزیر برائے منصوبہ بندی اسد عمر نے پارٹی میں گروپ بندی کا تاثرمسترد کرتے ہوئے کہا ہے کہ  جہانگیر ترین سے دوریاں نہیں ہیں۔ جہانگیر ترین نے کبھی تحریک انصاف کے خلاف بات نہیں کی۔ غلط فہمیاں پھیلانے والوں سے کہوں گا کہ ہن آرام اے۔

اسد عمر نے سماء کو انٹرویو دیتے ہوئے مزید کہا کہ پی ٹی آئی میں کوئی گروپ بندی نہیں۔جہانگیر ترین نے کبھی پی ٹی آئی کے خلاف بات نہیں کی، پاکستان تحریک انصاف جہانگر ترین کی مخالف نہیں۔انہوں نے مزید کہا کہ اتحادیوں سے رابطے میں تھے، اتحاد قائم رہے گا۔غلط فہمیاں پھیلانے والوں سے کہوں گا کہ ہن آرام اے۔

حکومت کی خارجہ پالیسی سے متعلق انہوں نے کہا کہ عمران خان صدر شی کی دعوت پر چین گئے تھے اور صدر پیوٹن کی دعوت پر روس جا رہے ہیں۔چینی صدر سے عمران خان کی یہ چوتھی ملاقات تھی اور یہ دورہ سب سے اچھا رہا۔اسد عمر نے کہا کہ امریکا نے بھی ہمیں اپنا اسٹریٹجک پارٹنر قرار دے دیا ہم کسی بلاک کا حصہ تھے، نہ بننا چاہتے ہیں۔

وفاقی وزیر نے مزید کہا کہ عمران خان نے احتساب کا سامنا کیا اور 40 سال پرانے ریکارڈ کا جواب دیا۔سندھ میں اگلی حکومت پیپلز پارٹی کی نہیں پی ٹی آئی اور اتحادی بنائیں گے۔قبل ازیں اسد عمر نے کہا ہے کہ گھر سنبھل نہیں رہا اور مولانا حکومت گرانے نکلے ہیں۔ اپنے بیان میں وفاقی وزیر اسد عمر نے خیبرپختونخوا میں بلدیاتی انتخابات کے پہلے مرحلے میں علی امین گنڈاپور کے بھائی عمر امین کی کامیابی پر مبارکباد دیتے ہوئے کہا کہ گھر سنبھل نہیں رہا اور مولانا حکومت گرانے نکلے ہیں۔

انہوں نے کہا کہ پہلے جنرل الیکشن اور اب مقامی حکومتوں کے الیکشن میں پی ٹی آئی کے ہاتھوں گھر کے حلقے میں انہیں شکست ہوئی۔اسد عمر نے لکھا کہ زبردست علی امین گنڈاپور، چھا گیا چیتا۔ خیال رہے کہ خیبرپختونخوا میں بلدیاتی انتخابات کے پہلے مرحلے کے غیرحتمی و غیر سرکاری نتیجے کے مطابق پاکستان تحریک انصاف کے عمر امین ڈیرہ اسماعیل خان سٹی کونسل کے میئر منتخب ہوگئے۔