اسحٰق ڈار اور امریکی وزیر خارجہ کا رابطہ، خطے کی صورتحال پر تبادلہ خیال

?️ 4 اگست 2025

اسلام آباد: (سچ خبریں) نائب وزیر اعظم اور وزیر خارجہ اسحٰق ڈار اور امریکی وزیر خارجہ مارکو روبیو کے درمیان ٹیلی فونک گفتگو ہوئی ہے، اس رابطے میں دونوں رہنماؤں نے دو طرفہ اور باہمی دلچسپی کے امور پر تبادلہ خیال کیا۔

ڈان نیوز کے مطابق وزیر خارجہ اسحٰق ڈار اور امریکی ہم منصب نے گفتگو کے دوران خطے کی صورت حال پر بھی تبادلہ خیال کیا، دونوں جانب سے باہمی رابطوں میں اضافے پر اتفاق کیا گیا۔

یاد رہے کہ اس سے قبل 29 جولائی کو بھی نائب وزیراعظم و وزیر خارجہ سینیٹر محمد اسحٰق ڈار نے امریکی وزیر خارجہ مارکو روبیو سے ٹیلی فون پر گفتگو کی تھی، جس میں دو طرفہ امور پر تبادلہ خیال کیا گیا تھا۔

سرکاری ریڈیو پاکستان کی رپورٹ میں کہا گیا تھا کہ یہ گفتگو گزشتہ جمعے کو واشنگٹن ڈی سی میں ہونے والی اُن کی ملاقات کے تسلسل میں ہوئی ہے۔

دونوں رہنماؤں نے محصولات سمیت باہمی تعلقات سے متعلق اہم امور پر گفتگو کی تھی، اس کے علاوہ علاقائی اور عالمی معاملات پر بھی تبادلہ خیال کیا گیا۔

واضح رہے کہ 25 جولائی کو نائب وزیرِ اعظم و وزیرِ خارجہ اسحٰق ڈار کی امریکی ہم منصب مارکو روبیو سے واشنگٹن ڈی سی میں اہم ملاقات ہوئی تھی، جس میں تجارتی و اقتصادی روابط کے فروغ، سرمایہ کاری، زراعت سمیت اہم شعبہ جات میں تعاون پر بھی تبادلہ خیال کیا گیا تھا۔

دفترِ خارجہ کے اعلامیے میں بتایا گیا تھا کہ اسحٰق ڈار کے امریکی محکمہ خارجہ پہنچنے پر امریکی حکام کی جانب سے شاندار استقبال کیا گیا، جہاں ان کی مارکو روبیو سے ملاقات کے دوران انسدادِ دہشت گردی اور علاقائی امن کے حوالے سے بات چیت ہوئی تھی۔