چینی خلائی گاڑی مریخ پر اتر گئی

?️ 23 مئی 2021

بیجنگ(سچ خبریں)چین کی ریموٹ کنٹرول خلائی گاڑی سرخ سیارے پر لینڈ کرگئی، اس لینڈنگ کے بعد چین مریخ کے پہلے مشن میں مدار میں جانے، لینڈ کرنے اور گاڑی بھیجنے والا پہلا ملک بن گیا۔ گزشتہ سال چین نے خلائی جہاز روانہ کیا تھا جو چھ ماہ بعد سرخ سیارے پر پہنچاتھا۔

چین کے سرکاری سوشل میڈیا کی پوسٹ کے مطابق چینی ریموٹ کنٹرول خلائی گاڑی چین کے وقت کے مطابق صبح 10 بج کر 40 منٹ پر مریخ کی سطح پر اتری۔شمسی توانائی سے چلنے والی ژورونگ اپنی 90 دن کی کھوج کے دوران قدیم زندگی کی علامتوں کی تلاش کرے گی جس میں زمین میں ریڈار داخل کر کے کسی بھی سطح پر پانی اور برف کی تلاش بھی شامل ہے۔

چین اس ماہ امریکا کے ساتھ ان دو ممالک کی فہرست میں شامل ہوگیا ہے جنہوں نے مریخ پر زمینی گاڑیاں اتاری ہیں۔واضح رہے کہ سابق سوویت یونین نے 1971 میں ایک خلائی جہاز مریخ پر اتارا تھا لیکن اترنے کے چند سیکنڈ بعد ہی اس کا رابطہ منقطع ہوگیا تھا۔

رپورٹ کے مطابق 240 کلو وزنی ژورونگ میں چھ سائنٹک آلات نصب ہیں، جن میں ہائی ریزولوشن والا ٹوپوگرافی کیمرہ بھی شامل ہے، جو 240 سیارے کی مٹی اور ماحول کا مطالعہ کرے گا۔خیال رہے کہ چین کا خودکار ’تیانوین ون‘ خلائی جہاز گذشتہ سال جولائی میں جنوبی چین کے جزیرے ہینن سے روانہ ہوا تھا۔ چھ ماہ کے سفر کے بعد ’تیانوین ون‘ رواں سال فروری میں سرخ سیارے پر پہنچا تھا اور تب سے یہ وہاں مدار میں ہے۔

پندرہ مئی کو خلائی جہاز سے روور عیلحدہ ہوا اور یوٹوپیا پلی نیٹیا کے نام سے مشہور ایک وسیع میدان پر اتر گیا، گذشتہ بدھ کو چینی خلائی ایجنسی نے خلائی گاڑی کے ذریعے لی گئی پہلی تصاویر جاری کی تھیں۔