ٹک ٹاک نے 3 ماہ میں پاکستان سے 3 کروڑ سے زائد ویڈیوز ڈیلیٹ کردیں

سچ خبریں: شارٹ ویڈیو شیئرنگ پلیٹ فارم ٹک ٹاک نے کمیونٹی گائڈ لائنز کی خلاف ورزی پر 2024 کی دوسری سہ ماہی کے دوران پاکستان سے تین کروڑ سے زائد ویڈیوز کو ڈیلیٹ کردیا۔

ٹک ٹاک کی جانب سے جاری کردہ کمیونٹی گائیڈ لائنز انفورسمنٹ رپورٹ کے مطابق حالیہ عرصے میں پاکستان میں ٹک ٹاک سے 30,709,744 سے زیادہ ویڈیوز کو حذف کیا گیا۔

رپورٹ میں بتایا گیا کہ جن ویڈیوز کو حذف کیا گیا کہ اِن میں سے 99.5 فیصد ویڈیوز کو صارفین کی جانب سے رپورٹ کرنے سے پہلے ہی حذف کر دیا گیا جبکہ 97 فیصد کو 24 گھنٹوں کے اندر حذف کر دیا گیا۔

مذکورہ اعداد و شمار ٹک ٹاک کی جانب سے پلیٹ فارم کو پاکستانی صارفین کے لیے محفوظ پلیٹ فارم کو یقینی بنانے کے عزم کو اجاگر کرتے ہیں۔

یہاں یہ بات بھی یاد رہے کہ ٹک ٹاک پر روزانہ دنیا بھر کے ایک ارب سے زائد افراد کے وزٹ کرتے ہیں اور وہاں لاکھوں کی تعداد میں ویڈیوز اور تصاویر سمیت دوسرا مواد پوسٹ کیا جاتا ہے۔

ٹک ٹاک نے پاکستان کے علاوہ 2024 کی دوسری سہ ماہی میں دنیا بھر سے 178,827,465 سے زیادہ ویڈیوز کو حذف کیا۔

حذف کی گئی ویڈیوز میں سے 144,430,133 کو آٹومیشن کے ذریعے حذف کیا گیا ، جس سے پلیٹ فارم کی جانب سے رئیل ٹائم میں نقصان دہ کانٹنٹ کو ختم کرنے کے لیے اپنی ڈیٹیکشن ٹیکنالوجی کے جدید استعمال کی نشاندہی ہوتی ہے۔

رپورٹ میں بحال شدہ ویڈیوز کی تعداد میں 50 فیصد کمی پر بھی روشنی ڈالی گئی ہے، جس سے ٹک ٹاک کے کانٹنٹ میں اعتدال کے نظام کی درستگی اور تاثیر کو تقویت ملتی ہے۔