مہنگائی کے دور میں انفینکس کی ہاٹ سیریز کے سستے فون متعارف

?️ 11 دسمبر 2023

سچ خبریں: اسمارٹ موبائل فون بنانے والی چینی کمپنی انفینکس نے مہنگائی کے دور میں رواں سال کے سستے ترین فون متعارف کرا دیے، جنہیں فیچرز اور کیمروں کے حوالے سے معیاری قرار دیا جا رہا ہے۔

کمپنی نے انفینکس ہاٹ 40، ہاٹ 40 پرو اور ہاٹ 40 آئی کو مختلف رنگوں اور ماڈیولز میں پیش کیا ہے، تاہم کمپنی نے تمام فونز کی قیمت مناسب رکھی ہے۔

کمپنی نے تینوں فونز کو 6.75 انچ اسکرین کے ساتھ متعارف کرایا ہے، تاہم ہاٹ 40 آئی کی اسکرین کو تھوڑا سا چھوٹا رکھا گیا ہے۔

تینوں فونز کو 5 ہزار ایم اے ایچ بیٹری کے ساتھ پیش کیا گیا ہے، تاہم تینوں میں مختلف چارجر دیے گئے ہیں، سب سے کم 18 واٹ کا چارجر ہاٹ 40 آئی میں دیا گیا ہے جب کہ باقی دونوں فونز میں 33 واٹ کے فاسٹ چارجرز دیے گئے ہیں۔

کمپنی کا دعویٰ ہے کہ ہاٹ 40 اور ہاٹ 40 پرو کو محض 35 منٹ کی چارجنگ سے 75 فیصد چارج کیا جا سکتا ہے۔

اسی طرح کمپنی نے تینوں فونز میں فنگر پرنٹ سینسر سمیت دیگر سیکیورٹی فیچرز بھی دیے ہیں۔

انفینکس نے ہاٹ سیریز کے تینوں فونز کو ایک ہی ریم 4 جی بی میں پیش کیا ہے، تاہم ان میں میموری کے دو آپشنز یعنی 128 اور 256 جی بی دیے گئے ہیں۔

تینوں فونز میں چپ سمیت پراسیسر کی ٹیکنالوجی بھی ایک جیسی ہی رکھی گئی ہے جب کہ تمام فونز کو اپگریڈ ٹیکنالوجی کے ساتھ پیش کیا گیا ہے۔

تینوں فونز میں کیمروں کا فرق رکھا گیا ہے، کسی بھی فون کے بیک پر تین کیمرے نہیں دیے گئے جب کہ تمام فونز میں سیلفی کیمرا یکساں دیا گیا ہے لیکن تینوں فونز کے کیمروں کے فیچرز مختلف رکھے گئے ہیں۔

سب سے بہترین کیمرے ہاٹ 40 پرو میں دیے گئے ہیں، جس کے بعد پر مین کیمرا 108 میگا پکسل جب کہ دوسرا دو میگا پکسل کا دیا گیا ہے۔

اسی طرح ہاٹ 40 کے بیک پر مین کیمرا 64 میگا پکسل کا دیا گیا ہے جب کہ دوسرے کیمرے کو دو میگا پکسل لیکن جدید لینسز کے ساتھ پیش کیا گیا ہے۔

ہاٹ 40 آئی کو ایک ہی 50 میگا پکسل بیک کیمرے جب کہ 32 میگا پکسل سیلفی کیمرے کے ساتھ متعارف کرایا گیا ہے۔

کمپنی نے تینوں فونز کی قیمتوں کا اعلان نہیں کیا، تاہم بتایا ہے کہ تمام فونز کی قیمت 200 امریکی ڈالر یعنی پاکستانی 57 ہزار روپے سے کم رکھی گئی ہے۔

اس حساب سے انفینکس ہاٹ سیریز کا بہترین فون بھی 56 ہزار روپے تک کا ہوگا جب کہ سب سے کم قیمت فون 40 ہزار روپے تک ہونے کا امکان ہے۔

کمپنی نے تمام فونز کو ابتدائی طور پر صرف چین میں متعارف کرایا ہے، تاہم جلد ہی انہیں پاکستان سمیت دیگر ممالک میں بھی فروخت کے لیے پیش کردیا جائے گا۔