آن لائن سیفٹی سے متعلق ٹک ٹاک اور پی ٹی اے کا مشترکہ ڈیجیٹل سیفٹی مقابلہ

سچ خبریں: شارٹ ویڈیو شیئرنگ پلیٹ فارم ٹک ٹاک نے پی ٹی اے  کے تعاون سے پاکستان بھر کے نوجوانوں میں ڈیجیٹل سیفٹی سے متعلق آگاہی پیدا کرنے کے لیے DigitalHifazat# مقابلہ شروع کرنے کا اعلان کردیا۔

یہ مقابلہ ٹک ٹاک کے کریئیٹرز کو ایسی مختصر اور مؤثر ویڈیوز تیار کرنے کی دعوت دیتا ہے جن میں چھ اہم شعبوں پر روشنی ڈالی گئی ہو۔

مقابلے کے تحت مواد تخلیق کار سوشل میڈیا کا ذمہ دارانہ استعمال، آن لائن ہراسانی کا مقابلہ، آن لائن دھوکہ دہی کی روک تھام، نوجوانوں کے تحفظ اور فلاح و بہبود کو یقینی بنانا، ٹک ٹاک کے سیفٹی ٹولز کو سمجھنا اور سوشل میڈیا پلیٹ فارمز پر غلط معلومات کو روکنے جیسے موضوعات پر مختصر ویڈیوز بنا سکیں گے۔

مقابلے کے ذریعےٹک ٹاک اور پی ٹی اے کا مقصد پلیٹ فارم کے صارفین کو ڈیجیٹل سیفٹی کا پیغام پھیلانے اور شیئر کرنے سے قبل معلومات کی تصدیق کے رُجحان کو فروغ دینے کی حوصلہ افزائی کرنا ہے۔

اس مقابلے میں شرکت کرکے صارفین دوسروں کو ذمہ دارانہ آن لائن طرز عمل کے بارے میں آگاہی دینے میں کردار ادا کرسکیں گے اور سب کے لیے ایک محفوظ ڈیجیٹل ماحول کی تخلیق میں حصہ لیں گے۔

یہ DigitalHifazat# مقابلہ ٹک ٹاک کی اُن اقدار کو برقرار رکھنے اور اپنی عالمی برادری کے لیے ایک محفوظ اور مثبت مقام برقرار رکھنے کی جاری کوششوں کا حصہ ہے۔

کریئیٹرز DigitalHifazat# ہیش ٹیگ کے ساتھ اپنی ویڈیوز پوسٹ کرکے ptaofficialpk @ کو ٹیگ کرکے مقابلے میں شامل ہوسکتے ہیں۔

انگریزی اور اردو زبانوں میں دستیاب ٹک ٹاک پر مقابلے کےآفیشل ہیش ٹیگ پیج پر فارم پُر کر کے ویڈیوز کے ساتھ جمع کراناضروری ہے۔

ایپ پر DigitalHifazat# ہیش ٹیگ تلاش کرکے پیج تک رسائی حاصل کی جاسکتی ہے۔

کامیاب ویڈیوز کا انتخاب کانٹینٹ کے معیار، موضوع سے مطابقت اور ٹک ٹاک کی کمیونٹی گائیڈ لائنز کی تعمیل کی بنیاد پر کیا جائے گا۔

نتائج کا اعلان آفیشل ہیش ٹیگ پیج پر کیا جائے گا اور کامیاب شرکت کنندہ کو ایپل آئی پیڈ ایئر دیا جائے گا جبکہ 2 رنر اپ کو سام سنگ اسمارٹ فون ملیں گے۔

مذکورہ مقابلے میں 13 برس اور اس سے زائد عمر کے صارفین شرکت کر سکیں گے۔

ٹک ٹاک اور پی ٹی اے کے درمیان یہ شراکت داری پاکستان میں ڈیجیٹل خواندگی اور تحفظ کو بڑھانے کے مشترکہ عزم کی عکاسی کرتی ہے۔ یہ مقابلہ جو کہ 20 اکتوبر سے شروع ہوچکا ہے، 05 نومبر 2024 تک جاری رہے گا۔