صیہونیوں کا غزہ پر مکمل قبضے کا منصوبہ

سچ خبریں:صیہونی میڈیا نے انکشاف کیا ہے کہ کابینہ نے متفقہ طور پر غزہ پر مکمل قبضے کا منصوبہ منظور کر لیا ہے، جس کا مقصد حماس کو شکست دینا اور اسرائیلی قیدیوں کی واپسی کو ممکن بنانا ہے، تاہم فوجی حلقے اس منصوبے پر تحفظات ظاہر کر رہے ہیں۔

صیہونی ذرائع ابلاغ نے انکشاف کیا ہے کہ صہیونی کابینہ نے ایک خفیہ اجلاس میں غزہ پٹی پر مکمل قبضے اور اس کے تمام علاقوں پر صہیونی فوج کی مستقل موجودگی سے متعلق ایک نیا منصوبہ متفقہ طور پر منظور کر لیا ہے۔

یہ بھی پڑھیں:غزہ میں جنگ بندی کے لیے صیہونی حکومت کا نیا منصوبہ

عربی ۲۱ نیوز ویب سائٹ کے مطابق، اسرائیلی ٹی وی چینل چینل 12 نے وزیراعظم بنیامین نیتن یاہو کے دفتر سے منسلک ایک ذریعے کے حوالے سے بتایا ہے کہ اس منصوبے کے تحت حماس کی مکمل شکست اور اسرائیلی قیدیوں کی بازیابی کو مرکزی اہداف کے طور پر رکھا گیا ہے۔

تاہم ماضی میں غزہ کے بیشتر حصے پر قبضہ کے باوجود اسرائیل ان اہداف کو حاصل کرنے میں ناکام رہا ہے۔

صہیونی میڈیا کا دعویٰ ہے کہ اس منصوبے کے ساتھ ساتھ اسرائیلی حکومت نے انسانی امداد کی تقسیم کا ایک متبادل منصوبہ بھی بنایا ہے، جس کا مقصد یہ ہے کہ امداد حماس کے ہاتھ نہ لگے۔

تاہم صہیونی حکومت کے متنازع وزیر برائے داخلی سلامتی ایتمار بن گویر نے غزہ میں کسی بھی انسانی امداد کی فراہمی کی سخت مخالفت کی ہے۔ ان کا کہنا ہے کہ غزہ میں جو خوراک بچ گئی ہے، اس پر بھی میزائل برسنے چاہئیں۔

اس غیر انسانی مؤقف پر اسرائیلی فوج کے چیف آف اسٹاف ایال زامیر نے سخت ردعمل دیا ہے۔ انہوں نے بن گویر کو مخاطب کرتے ہوئے کہا کہ تمہیں اندازہ نہیں کہ تم کیا کہہ رہے ہو، تمہاری باتیں ہم سب کو خطرے میں ڈال رہی ہیں۔ ہم پوری غزہ آبادی کو بھوکا نہیں رکھ سکتے، یہ انتہائی خطرناک مؤقف ہے۔

مزید پڑھیں:اسرائیلی وزیر خزانہ نے غزہ جنگ بندی معاہدے کو تباہی قرار دیا

فوجی قیادت کی طرف سے اس تنقید نے اسرائیلی حکومت کے داخلی اختلافات کو بھی نمایاں کیا ہے، جو اس وقت جنگی محاذ اور بین الاقوامی دباؤ کے دوہرے چیلنجز کا سامنا کر رہی ہے۔