صیہونی وزارت خزانہ کا جنگی ذخائر کے لیے اضافی فنڈز دینے سے انکار 

سچ خبریں:صیہونی وزارت خزانہ نے 60 ارب شیکل اضافی بجٹ کے مطالبے کو مسترد کر دیا، جس کا مقصد ایران اور غزہ کے خلاف جنگ میں استعمال شدہ فوجی ذخائر کو دوبارہ بھرنا تھا۔

عبرانی زبان کے نیوز پورٹل وای نٹ کی رپورٹ کے مطابق، صیہونی وزارت خزانہ اور وزارت جنگ کے درمیان ایران اور غزہ کے خلاف حالیہ جنگوں کے دوران استعمال شدہ اسلحہ ذخائر کی بحالی کے لیے فنڈنگ پر شدید اختلافات سامنے آئے ہیں۔

یہ بھی پڑھیں:امریکہ کا جنگ میں داخل ہونا ایران کے لیے خطرہ ہے یا موقع؟

روسی نیوز چینل روسیا الیوم کی رپورٹ کے مطابق، اسرائیلی وزارت خزانہ نے فوجی اسلحہ، میزائل، ڈرونز اور بکتر بند گاڑیوں کے ذخائر دوبارہ بھرنے کے لیے 60 ارب شیکل (اسرائیلی کرنسی) کی اضافی رقم فراہم کرنے سے انکار کر دیا ہے۔

وزارت خزانہ کا مؤقف ہے کہ جنگ میں استعمال ہونے والی اسلحہ کی خریداری کے اخراجات 2025 کے سالانہ بجٹ میں شامل نہیں تھے، اور فوج نے ان اخراجات کی پیشگی اطلاع دیے بغیر عمل کیا۔ وزارت نے فوج پر الزام عائد کیا ہے کہ وہ قومی بجٹ کو غیر ضروری اور فضول طریقے سے استعمال کر رہی ہے۔

رپورٹ میں کہا گیا ہے کہ اس اختلاف کی وجہ سے اسرائیلی فوج کے کئی اہم منصوبے تعطل کا شکار ہو سکتے ہیں، جن میں فضائی دفاعی میزائل سسٹم، ڈرونز، اور اینٹی ٹینک بکتر بند گاڑیاں شامل ہیں۔ فوج کا ارادہ تھا کہ وہ حالیہ جنگ کے بعد نیوی اور فضائیہ کے اسلحہ ذخائر کو دوبارہ مکمل کرے، تاہم مالی معاونت کے بغیر یہ ممکن نہیں رہے گا۔

مزید پڑھیں:ٹرمپ کا نیتن یاہو پر غزہ جنگ بند کرنے کے لیے دباؤ 

یاد رہے کہ امریکی حکام نے بھی حالیہ ایران-اسرائیل کشیدگی کے دوران اعتراف کیا تھا کہ تل ابیب کے اسلحہ ذخائر خطرناک حد تک کم ہو چکے ہیں۔ واینت نے مزید لکھا کہ ہر گزرتا دن جس میں یہ فنڈز مہیا نہیں کیے جاتے، اسرائیل کی آئندہ کسی بھی ممکنہ جنگ میں شمولیت کی صلاحیت کو کمزور کرتا ہے۔