حزب اللہ کو غیر مسلح کرنے پر مبنی خبروں کی حقیقت کیا ہے؟

سچ خبریں:حزب اللہ کے  ایک اعلی عہدیدار کا کہنا ہے کہ سوشل میڈیا پر کی جانے والی باتوں سے متاثر نہ ہوں،کوئی بھی طاقت حزب اللہ کو غیر مسلح نہیں کر سکتی۔

حزب اللہ کے رابطہ و ہم آہنگی امور کے سربراہ وفیق صفا نے حالیہ دنوں میں حزب اللہ کو اسلحہ سے محروم کرنے سے متعلق خبروں اور الزامات پر دوٹوک ردعمل دیا ہے۔

یہ بھی پڑھیں:حزب اللہ کو فوری طور پر غیرمسلح ہونا چاہیے:امریکہ

 انہوں نے واضح الفاظ میں کہا کہ خلع سلاح (اسلحہ سے محرومی) کی باتیں صرف میڈیا اور اشتعال انگیز عناصر کی جانب سے کی جا رہی ہیں، جبکہ حقیقت میں ایسا کوئی موضوع زیر غور ہی نہیں۔

وفیق صفا نے زور دیا کہ خلع سلاح جیسی کوئی اصطلاح نہ تو حزب اللہ کے اندر زیر بحث ہے اور نہ ہی کسی قومی ادارے میں۔ جو بات لبنان کے صدر جوزف عون کی جانب سے کہی گئی ہے، وہ دراصل دفاعی حکمت عملی (ڈیفنس اسٹریٹیجی) سے متعلق ہے نہ کہ حزب اللہ کو غیر مسلح کرنے سے۔

انہوں نے کہا کہ دفاعی حکمت عملی پر بات چیت اس وقت تک ممکن نہیں جب تک صیہونی ریاست (اسرائیل) کی پسپائی، لبنانی قیدیوں کی رہائی، جارحیت کا خاتمہ اور اقوام متحدہ کی قرارداد 1701 پر مکمل عملدرآمد نہیں ہو جاتا۔

وفیق صفا نے حزب اللہ کے ہتھیار جمع کرانے کے بجائے لبنانی فوج کو جدید اسلحے سے لیس کرنے کا مطالبہ کیا،ان کا کہنا تھا:

موجودہ علاقائی حالات انتہائی حساس ہیں،میں مزاحمت کے حامیوں سے کہتا ہوں کہ سوشل میڈیا پر کی جانے والی باتوں سے متاثر نہ ہوں۔

کوئی بھی طاقت حزب اللہ کو غیر مسلح نہیں کر سکتی۔ اسرائیل بھی یہ کام کرنے میں ناکام رہا، حزب اللہ خدا کی طاقت پر بھروسہ رکھتا ہے، اور کوئی اسے شکست نہیں دے سکتا۔

مزید پڑھیں:لبنانی حکومت حزب اللہ کے مکمل خلع سلاح کی ذمہ دار ہے:امریکہ  

انہوں نے اس بات کا اعادہ کیا کہ حزب اللہ ایک قومی مزاحمتی قوت ہے اور لبنان کے دفاع کی ضامن ہے،اس کا اسلحہ محض ایک دفاعی ضرورت ہے، نہ کہ داخلی کشیدگی کا ذریعہ۔