لندن میں ایک بار پھر نسل پرستی کے خلاف شدید مظاہرے شروع ہوگئے

?️ 6 اپریل 2021

لندن (سچ خبریں)  لندن کے شہریوں نے ایک بار پھر ملک میں جاری نسل پرستی اور پولیس کے اختیارات میں اضافے کے خلاف شدید مظاہرے شروع کردیئے جس کے بعد پولیس نے متعدد افراد کو گرفتار کرلیا ہے۔

تفصیلات کے مطابق مرکزی لندن اور اس کے اطراف کی سڑکوں پر ہونے والے ان مظاہروں میں شریک لوگ بڑے پرامن اور منظم انداز میں، نسل پرستی کی تمام شکلوں کا مقابلہ کرنے اور پولیس کے اختیارات میں اضافے کا بل منسوخ کیے جانے کا مطالبہ کر رہے تھے۔

عینی شاہدین کے مطابق برطانوی پولیس نے نسل پرستی اور پولیس کے اختیارات میں اضافے کے خلاف مظاہرہ کرنے والے کم سے کم چھبیس افراد کو گرفتار کرلیا ہے۔

قابل ذکر ہے کہ برطانیہ میں نسل پرستی اور پولیس کے اختیارات میں اضافے کے خلاف تسلسل کے ساتھ مظاہرے کیے جارہے ہیں جنہیں دبانے کے لیے پولیس کی جانب سے طاقت کا استعمال کیا جارہا ہے جس کے دوران درجنوں افراد زخمی ہوچکے ہیں۔

برطانوی وزیراعظم بورس جانسن نے پولیس کے اختیارات میں اضافے کے خلاف ہونے والے مظاہروں کو شرمناک قرار دیتے ہوئے اس حوالے سے پاس کیے جانے والے بل کی حمایت کی ہے۔

واضح رہے کہ شہری اور انسانی حقوق کا دعوی کرنے والے ملک برطانیہ کی پارلیمنٹ نے تین ہفتے قبل ایک متنازعہ بل منظور کیا تھا جس کی رو سے مظاہرین کی سرکوبی کی غرض سے پولیس کے اختیارات میں مزید اضافہ کردیا گیا ہے۔