اقوام متحدہ میں یوکرین جنگ بندی سے متعلق امریکی قرارداد منظور

سچ خبریں:اقوام متحدہ کی سلامتی کونسل نے امریکہ کی جانب سے پیش کردہ یوکرین جنگ بندی کی قرارداد کو منظور کر لیا، جس میں کیف اور ماسکو کے درمیان فوری جنگ بندی اور ایک دیرپا امن معاہدے کا مطالبہ کیا گیا ہے۔ 

الجزیرہ نیوز چینل کی رپورٹ کے مطابق امریکہ نے یوکرین جنگ بندی سے متعلق منگل کی رات سلامتی کونسل میں ایک قرارداد پیش کی جسے 10 مثبت ووٹوں اور 5 غیر جانبدار ووٹوں کے ساتھ منظور کر لیا گئی جبکہ کسی بھی ملک نے اس کی مخالفت نہیں کی۔

یہ بھی پڑھیں:یوکرین جنگ کےعالمی نظام پر سیاسی اثرات

یہ قرارداد ایسے وقت میں منظور کی گئی جب امریکہ نے حال ہی میں بیلجیم اور یوکرین کی طرف سے پیش کی گئی روس مخالف قرارداد کو ویٹو کر دیا تھا۔

امریکہ کا یہ فیصلہ حیران کن تھا کیونکہ واشنگٹن نے اس سے پہلے روس کے خلاف پیش کی جانے والی قراردادوں کی حمایت کی تھی۔

اس اجلاس میں، اقوام متحدہ کی جنرل اسمبلی نے یوکرین اور مغربی ممالک کی جانب سے پیش کی گئی ایک اور روس مخالف قرارداد کو بھی منظور کیا، لیکن اس بار امریکہ نے اس قرارداد کی مخالفت کی۔

یاد رہے کہ یہ پہلا موقع تھا جب واشنگٹن نے یوکرین اور اس کے اتحادیوں کی طرف سے پیش کردہ روس مخالف قرارداد کی مخالفت کی۔

اقوام متحدہ میں امریکی مندوب نے قرارداد کی منظوری سے پہلے کہا کہ ہم اقوام متحدہ میں پیش کی جانے والی روس مخالف قرارداد کی حمایت نہیں کریں گے اور اسے مسترد کرنے کا مطالبہ کرتے ہیں۔

 انہوں نے مزید وضاحت کی کہ یہ قرارداد کسی حتمی امن معاہدے کے بجائے صرف امن کی راہ ہموار کرنے کا ایک ذریعہ ہے۔

اس سے قبل امریکہ نے یورپی یونین اور یوکرین کی طرف سے مشترکہ طور پر پیش کی گئی قرارداد کو اپنی متبادل قرارداد سے تبدیل کرنے کا مطالبہ کیا تھا۔

اس سے ظاہر ہوتا ہے کہ واشنگٹن یوکرین جنگ کے معاملے پر نئی سفارتی حکمت عملی اپنا رہا ہے جس میں وہ براہ راست امن مذاکرات کو آگے بڑھانے کی کوشش کر رہا ہے۔

واضح رہے کہ یہ قرارداد امریکہ کے سفارتی موقف میں ایک بڑی تبدیلی کی نشاندہی کرتی ہے، یوکرین جنگ کے آغاز سے لے کر اب تک، واشنگٹن ہمیشہ یوکرین کی حمایت میں کھڑا رہا ہے لیکن حالیہ دنوں میں ڈونلڈ ٹرمپ کی قیادت میں امریکی حکومت نے یوکرین کے حوالے سے اپنے پالیسی مؤقف میں نمایاں تبدیلی کی ہے۔

مزید پڑھیں:یوکرین کی جنگ کے تیسرے سال میں میدان جنگ، نقصانات اور اقتصادی اثرات کا جائزہ

امریکہ کی یوکرین-روس جنگ کے فوری خاتمے کی حمایت اور روس مخالف قراردادوں سے پیچھے ہٹنا اس بات کا اشارہ دے سکتا ہے کہ واشنگٹن ماسکو کے ساتھ سفارتی تعلقات کو بحال کرنے کی کوشش کر رہا ہے۔