امریکی صدر جو بائڈن نے شمالی کوریا کے خلاف بڑا بیان جاری کردیا

?️ 23 مئی 2021

واشنگٹن (سچ خبریں)  امریکی صدر جو بائڈن نے شمالی کوریا کے خلاف بڑا بیان جاری کرتے ہوئے کہا ہے کہ ہم شمالی کوریا کو جوہری اسلحہ سے بالکل پاک کرنا چاہتے ہیں اور اسے اس بات کی اجازت نہیں دیں گے کہ وہ جوہری اسلحہ رکھ کر دنیا کے لیئے خطرہ بنے۔

تفصیلات کے مطابق امریکی صدر جو بائڈن نے واضح کیا ہے کہ امریکہ اور جنوبی کوریا کو شمالی کوریا کی صورتحال پر خدشات لا حق ہیں اور خطے میں ہمارا ہدف جزیرہ نما شمالی کوریا کو جوہری اسلحہ سے مکمل طور پر پاک کرنا ہے۔

بائڈن اور جنوبی کوریا کے صدر مون جیان نے وائٹ ہاؤس میں دو طرفہ اور بین الاوفود مذاکرات کے بعد مشترکہ پریس کانفرس کا اہتمام کیا۔

بائڈن نے دو طرفہ مذاکرات میں متعدد معاملات میں پیش قدمی کرنے کی توضیح کرتے ہوئے کہا کہ ہم نے شمالی کوریا کے جوہری اور میزائل پروگرام کے بارے میں مشترکہ لائحہ عمل کا تعین کرنے پر مطابقت قائم کی ہے، شمالی کوریا کی صورتحال پر دونوں فریقین کو خدشات لاحق ہیں، علاوہ ازیں شمالی کوریا کے ساتھ تناؤ میں کمی لانے کے لیے امریکی رائے عامہ اس ملک کے ساتھ عملی اور تعمیری سفارتی تعلقات کے قیام کی خواہاں ہے۔

شمالی کوریا سے متعلق سفارتی کوششوں کو جاری رکھنے پر زور دینے والے جو بائڈن کا کہنا تھا کہ امریکی دفتر خارجہ میں کام کرنے والے سونگ کم کو نمائندہ خصوصی برائے شمالی کوریا متعین کر دیا گیا ہے۔

انہوں نے عام وبا کے خلاف جدوجہد میں عالمی شراکت داری کی اہمیت کی جانب اشارہ دیتے ہوئے کہا کہ ہم نے ویکسین کی تیاری کے معاملے میں شراکت داری کے قیام پر اتفاق قائم کیا ہے۔