اقوام متحدہ کا غزہ کے تمام علاقوں میں عالمی انسپکٹرز کو رسائی دینے کا مطالبہ

?️ 15 ستمبر 2026

سچ خبریں:اقوام متحدہ نے غزہ میں ملبے تلے سے سیکڑوں انسانی باقیات ملنے کے بعد جنگی جرائم کے ممکنہ شواہد جمع کرنے اور تحقیقات کے لیے بین الاقوامی انسپکٹرز کو غزہ کے تمام علاقوں تک رسائی دینے کا مطالبہ کیا ہے۔

اقوام متحدہ نے غزہ میں ملبے تلے سے سیکڑوں لاشیں اور انسانی باقیات ملنے کے بعد جنگی جرائم کے ممکنہ شواہد جمع کرنے اور تحقیقات کے لیے بین الاقوامی انسپکٹرز کو اس محصور پٹی کے تمام علاقوں تک رسائی دینے کا مطالبہ کیا ہے۔

فرانسیسی خبر رساں ادارے کے مطابق اقوام متحدہ کے ہائی کمشنر برائے انسانی حقوق وولکر ترک نے کہا ہے کہ غزہ میں تباہ شدہ عمارتوں کے ملبے سے بڑی تعداد میں انسانی باقیات، جن میں زیادہ تر خواتین اور بچے شامل ہیں، ملنے سے جنگی جرائم کے ممکنہ ارتکاب کے خدشات میں اضافہ ہوگیا ہے۔

اقوام متحدہ کے انسانی حقوق کے دفتر نے بتایا کہ فلسطینی سول ڈیفنس کے اہلکار اب تک تباہ شدہ عمارتوں کے ملبے سے 630 سے زائد لاشیں اور انسانی باقیات نکال چکے ہیں، جبکہ ملبے تلے لاپتا افراد کی تعداد 8000 سے زیادہ ہونے کا اندازہ ہے۔

وولکر ترک نے متاثرین کی دستاویز بندی اور شناخت، فرانزک شواہد اور حیاتیاتی نمونوں کو محفوظ رکھنے اور متاثرین کے اہل خانہ کو اطلاع دینے کا مطالبہ کیا۔ انہوں نے زور دیا کہ بین الاقوامی انسپکٹرز کو غزہ کے تمام علاقوں تک رسائی دی جانی چاہیے۔

غزہ کی وزارت صحت کے مطابق صہیونی حکومت کی غزہ کے خلاف جنگ میں اب تک 73000 سے زیادہ فلسطینی شہید ہوچکے ہیں۔