ٹرمپ کا دس لاکھ فلسطینیوں کو لیبیا منتقل کرنے کا متنازعہ منصوبہ 

سچ خبریں:امریکی میڈیا نے انکشاف کیا ہے کہ ٹرمپ انتظامیہ نے غزہ کے تقریباً ایک ملین فلسطینیوں کی لیبیا منتقلی کا منصوبہ سنجیدگی سے زیر غور رکھا ہے جس کے تحت فلسطینی رہنماؤں اور لیبی حکام سے اس معاملے پر مشاورت ہوئی، تاہم ابھی کوئی حتمی فیصلہ نہیں ہوا۔

امریکی نشریاتی ادارے این بی سی نیوز نے اپنے ذرائع کے حوالے سے انکشاف کیا ہے کہ سابق امریکی صدر ڈونلڈ ٹرمپ کی انتظامیہ نے غزہ کی پٹی سے تقریباً ایک ملین فلسطینیوں کو مستقل طور پر لیبیا منتقل کرنے کے منصوبے پر سنجیدگی سے غور کیا تھا۔

یہ بھی پڑھیں:فلسطینیوں کی زبردستی نقل مکانی کی کسی بھی کوشش کو مسترد کرتے ہیں، اسحٰق ڈار

ذرائع کے مطابق، اس منصوبے پر اتنی سنجیدگی سے بات چیت ہوئی کہ ٹرمپ حکومت نے اس بارے میں لیبیا کے حکام سے بھی مشاورت کی۔

منصوبے کے مطابق، اگر فلسطینیوں کو لیبیا میں آباد کیا جاتا تو امریکہ، لیبیا کے ان اربوں ڈالر کے اثاثے بحال کرنے پر رضامند ہوتا جو ایک دہائی سے زائد عرصے سے امریکہ میں منجمد ہیں۔

این بی سی نیوز کے مطابق، اس معاملے میں اسرائیلی حکام کو بھی اعتماد میں لیا گیا، لیکن تاحال اس منصوبے پر کوئی حتمی معاہدہ نہیں ہوا۔

امریکی محکمہ خارجہ اور وائٹ ہاؤس کی قومی سلامتی کونسل نے اس حوالے سے میڈیا کی جانب سے کی گئی متعدد درخواستوں کا جواب نہیں دیا۔

دوسری طرف، غزہ کی حکومتی جماعت حماس کے سینئر رہنما باسم نعیم نے این بی سی کو بتایا کہ انہیں اس طرح کے کسی بھی منصوبے یا مذاکرات کی کوئی خبر نہیں۔

مزید پڑھیں:غزہ کو صرف رضاکارانہ نقل مکانی کی مدد فراہم کی جانی چاہیے: صہیونی

ان کا کہنا تھا کہ فلسطینی اپنی سرزمین سے گہری وابستگی رکھتے ہیں اور وہ اس کے دفاع کے لیے اپنی جانیں بھی قربان کرنے کو تیار ہیں،اپنے مستقبل کا فیصلہ صرف فلسطینی ہی کر سکتے ہیں، باہر سے مسلط کوئی منصوبہ قبول نہیں،اسی دوران، اسرائیلی نمائندگان نے بھی اس معاملے پر تبصرہ کرنے سے گریز کیا ہے۔