ٹرمپ کی جانب سے فلسطین کو تسلیم کرنے کا امکان؛صیہونی اخبار کی رپورٹ

سچ خبریں:صیہونی اخبار یروشلم پوسٹ نے انکشاف کیا ہے کہ امریکی صدر ڈونلڈ ٹرمپ مئی میں سعودی عرب میں ہونے والے اجلاس کے دوران فلسطین کو بطور ریاست تسلیم کرنے کا اعلان کر سکتے ہیں، جو مشرق وسطیٰ کی پالیسی میں بڑی تبدیلی کا پیش خیمہ ہو سکتا ہے۔

اسرائیلی روزنامہ یروشلم پوسٹ نے رپورٹ دی ہے کہ امریکی صدر ڈونلڈ ٹرمپ مئی کے وسط میں ریاض میں خلیجی ممالک کے رہنماؤں کے ساتھ ہونے والی ملاقات میں ممکنہ طور پر ریاست فلسطین کو باضابطہ طور پر تسلیم کرنے کا اعلان کریں گے۔

یہ بھی پڑھیں: یورپی ممالک کے لیے فلسطین کو تسلیم کرنا کیسا ہے؟ناروے کے سفارتکار

رپورٹ کے مطابق، ایک خلیجی سیاسی ذرائع کا کہنا ہے کہ یہ اقدام امریکی خارجہ پالیسی میں ایک بڑی تبدیلی کے مترادف ہو گا، اور اس کے نتیجے میں مزید عرب ممالک اسرائیل کے ساتھ تعلقات کو معمول پر لانے کے عمل میں شامل ہو سکتے ہیں۔

یہ اہم اجلاس ٹرمپ کے نئے صدارتی دورے کے تحت ان کے پہلے دورۂ سعودی عرب کے دوران منعقد ہو گا، جسے مشرق وسطیٰ کی سیاست میں ایک تاریخی موڑ قرار دیا جا رہا ہے۔

یہ خبر ایسے وقت میں سامنے آئی ہے جب مشرق وسطیٰ میں فلسطینی مسئلے پر امریکہ کی خاموشی اور اسرائیل کے ساتھ عرب ممالک کی بڑھتی ہوئی قربت پر تنقید بڑھ رہی ہے۔

مزید پڑھیں: برطانیہ اور فرانس فلسطین کو تسلیم کرنے کی راہ پر گامزن ہیں

 اگر یہ اعلان ہوتا ہے تو یہ امریکہ کی جانب سے فلسطینی خودمختاری کو تسلیم کرنے کی ایک غیر معمولی اور غیر متوقع پیش رفت ہوگی۔