صہیونی ریاست میں میرے شوہر کے خلاف سازش ہو رہی ہے؛سارہ نیتن یاہو کا انکشاف 

سچ خبریں:سارہ نیتن یاہو نے فاکس نیوز کو انٹرویو میں دعویٰ کیا ہے کہ ان کے شوہر، صیہونی وزیراعظم نیتن یاہو کے خلاف اندرونی اور غیر ملکی حمایت یافتہ سازشیں جاری ہیں۔ 

روسیہ الیوم کی رپورٹ کے مطابق صیہونی وزیراعظم بنیامین نیتن یاہو کی اہلیہ سارہ نیتن یاہو نے فاکس نیوز کو انٹرویو دیتے ہوئے دعویٰ کیا ہے کہ نیتن یاہو کے خلاف اسرائیل کے اندر ہی سازشیں کی جا رہی ہیں، جن میں بعض عناصر غیر ملکی پشت پناہی سے سرگرم ہیں۔

یہ بھی پڑھیں: عالمی سطح پر صیہونی مظالم کے خلاف مظاہرے؛ رفح میں فلسطینی پناہ گزینوں کے قتل عام کی مذمت

سارہ نیتن یاہو نے الزام عائد کیا کہ اسرائیلی ریاست میں موجود مخالف دھڑے، بیرونی ممالک سے مالی امداد حاصل کر کے نیتن یاہو کے خلاف منظم سازش کر رہے ہیں۔ ان کے مطابق یہ گروہ بنیادی ریاستی اداروں میں اثرورسوخ حاصل کر چکے ہیں اور عدالتی نظام جیسے ذرائع کو استعمال کر کے نیتن یاہو کی حکومت کو گرانا چاہتے ہیں۔

سارہ کا کہنا تھا کہ تل ابیب میں چند چھوٹے لیکن طاقتور بائیں بازو کے گروہ سرگرم ہیں، جنہیں بیرونی ریاستوں کی پشت پناہی حاصل ہے۔ انہوں نے کہا کہ یہ گروہ اسرائیلی اداروں میں مؤثر عہدوں پر فائز ہو چکے ہیں اور حکومت کے خلاف منصوبہ بندی کر رہے ہیں۔

سارہ نیتن یاہو نے امریکی سابق صدر ڈونلڈ ٹرمپ کا حوالہ دیتے ہوئے کہا کہ جیسا سلوک امریکہ میں ٹرمپ اور ان کے خاندان کے ساتھ کیا گیا، ویسا ہی اب نیتن یاہو اور ان کے خاندان کے ساتھ ہو رہا ہے۔

مزید پڑھیں: امریکی کانگریس کے سامنے نیتن یاہو کے خلاف مظاہرے

یاد رہے کہ نیتن یاہو کی پالیسیوں کے باعث صیہونی ریاست اس وقت متعدد داخلی بحرانوں کا شکار ہے، مقبوضہ علاقوںمیں اقتصادی بدحالی، غزہ میں جاری جنگ، اور صہیونی قیدیوں کا مسئلہ مسلسل بڑھتا جا رہا ہے، جس کی وجہ سے نیتن یاہو کی قیادت پر تنقید میں اضافہ ہوا ہے۔