متحدہ عرب امارات کی جانب سے اسرائیل کا بائیکاٹ ختم کرنے پر امریکا نے اہم قدم اٹھا لیا

?️ 10 اپریل 2021

واشنگٹن (سچ خبریں) متحدہ عرب امارات کی جانب سے اسرائیل کا بائیکاٹ ختم کرنے اور دہائیوں پرانا ملکی قانون منسوخ کرنے پر امریکا نے اہم قدم اٹھاتے ہوئے عرب امارات کو اسرائیل کابائیکاٹ کرنے والے ممالک کی فہرست سے نکال دیا ہے۔

تفصیلات کے مطابق امریکا میں متحدہ عرب امارات کے سفارتخانےکی جانب سے جاری بیان میں کہا گیا ہے کہ واشنگٹن نے امارات کو اسرائیلی بائیکاٹ والے ممالک کی فہرست سے نکال لیا ہے۔

یو اے ای سفارتخانے کا کہنا ہے کہ امریکی کمپنیوں کیلئے ابراہام معاہدوں سے فائدہ اٹھانےمیں آسانی ہوگی، یواےای نے اگست 2020 میں اسرائیل کا مالی بائیکاٹ ختم کردیاتھا۔

امارات کے صدر نے ایک فرمان جاری کرکے اسرائیل کے بائیکاٹ سے متعلق دہائیوں پرانا ملکی قانون منسوخ کیا تھا جس کے بعد دونوں ممالک کے درمیان سفارتی اور اقتصادی روابط باضابطہ طور پر بحال ہو گئے ہیں۔

امارات کے صدر خلیفہ بن زید النہیان کے فرمان میں تعلقات قائم کرنے کی توثیق کی گئی، اس طرح اسرائیلی اداروں اور افراد کے ساتھ تجارتی معاہدے اور سمجھوتے کرنے کی اجازت دے دی گئی ہے۔

اسی طرح اب اسرائیل کی تیار کردہ تمام مصنوعات اور سامان کو متحدہ عرب امارات میں داخلے اور فروخت کی اجازت ہو گی۔

واضح رہے کہ صدارتی فرمان ایک ایسے وقت پر جاری کیا گیا ہے جب اسرائیل کی سرکاری ائر لائن ای آئی اے آئی تل ابیب سے ابو ظبی کے لیے براہ راست پروازیں شروع کرنے کی تیاری کر رہی ہے۔