سعودی ولی عہد نے انصاراللہ کے خلاف دیا گیا بیان واپس لیتے ہوئے حوثیوں کو اہم پیش کش کردی

?️ 30 اپریل 2021

ریاض (سچ خبریں)  سعودی ولی عہد محمد بن سلمان نے انصاراللہ کے خلاف دیا گیا وہ بیان جس میں انہوں نے کہا تھا کہ ہم مختصر وقت میں حوثیوں کو ختم کرسکتے ہیں واپس لیتے ہوئے انصاراللہ سے سعوی عرب پر حملے روکنے کا مطالبہ کردیا ہے۔

تفصیلات کے مطابق سعودی ولی عہد محمد بن سلمان نے کہا ہے کہ اگر حوثی سعودی عرب پر حملہ بند کرنے کا عہد کرتے ہیں تو ریاض یمن میں حوثیوں کی حمایت کرنے کے لئے تیار ہے۔

غیر ملکی نیوز ایجنسی کے مطابق محمد بن سلمان نے نجی نیوز چینل کو دیئے گئے ایک انٹرویو کے دوران کہا کہ سعودی عرب حوثی حملوں کی بندش کے بدلے میں ایک پیش کش کرتا ہے جس میں معاشی مدد بھی شامل ہے۔

حوثی رہنما عبد الملک الحوثی کے ایران سے تعلقات کے بارے میں بات کرتے ہوئے بن سلمان نے کہا کہ اس میں کوئی شک نہیں کہ ایرانی حکومت کے ساتھ ان کے مضبوط تعلقات ہیں جس کی وجہ سے وہ اب تک ہمارے مقابلے میں کھڑے ہوئے ہیں لیکن الحوثی یمنی ہیں اور ہم امید کرتے ہیں کہ آخر کار وہ عربیت کا ساتھ دیں گے، اور ہم پر حملے بند کردیں گے۔

انہوں نے یہ بھی کہا کہ سعودی عرب ایران کے ساتھ اچھے تعلقات قائم کرنے کی خواہش رکھتا ہے کیونکہ سعودی عرب اس بات کو واضح طور پر جانتا ہیکہ ایران خطے میں ایک مضبوط طاقت ہے اور اس کے ساتھ اچھے تعلقات سے خطے کے حالات بہتر ہوں گے۔

واضح رہے کہ سعودی ولی عہد نے اپنے پچھلے بیانات کو بھی واپس لے لیا جس میں انہوں نے مختصر وقت میں ہی حوثیوں کو ختم کرنے کی دھمکی دی تھی انہوں نے کہا کہ میں اپنے بیان کو واپس لیتا ہوں کیونکہ ہمیں اس بات کا اندازہ ہوچکا ہے کہ حوثیوں کے ساتھ مقابلہ کرنا اتنا آسان نہیں ہے اس لیئے ہم انہیں دوستی اور جنگ بندی کی پیش کش کرتے ہیں۔