صیہونی کابینہ میں استعفوں کی لہر کا خطرہ

سچ خبریں:صیہونی وزیر کے مطابق، قیدیوں کے تبادلے کے معاہدے میں تاخیر کے باعث نیتن یاہو کابینہ میں استعفوں کی لہر کا خدشہ پیدا ہو گیا ہے، فوجی قیادت کی وارننگ پر انتہاپسند وزرا سخت برہم، صیہونی عوام میں بھی شدید غم و غصہ۔

ایک سینئر صیہونی وزیر نے خبردار کیا ہے کہ اگر رواں ہفتے قیدیوں کے تبادلے کا معاہدہ حتمی شکل اختیار نہیں کرتا تو صیہونی کابینہ بڑے پیمانے پر استعفوں کا سامنا کرے گی۔

یہ بھی پڑھیں:نیتن یاہو پر صیہونی میڈیا کی تنقید؛صرف اقتدار کی بقا کی فکر

المسیرہ  نیوز چینل کی رپورٹ کے مطابق عبرانی روزنامہ معاریو نے اسرائیل کے ایک اہم وزیر کے حوالے سے اطلاع دی ہے کہ اگر آئندہ چند روز میں قیدیوں کے تبادلے کا معاہدہ مکمل نہ ہوا تو اسرائیلی حکومت کو کابینہ کے وزرا کے اجتماعی استعفوں کا سامنا کرنا پڑ سکتا ہے۔

دوسری جانب اسرائیلی اخبار یدیعوت احرونٹ کے مطابق گزشتہ روز ہونے والے کابینہ اجلاس میں صیہونی فوج کے چیف آف اسٹاف کی جانب سے دی گئی اس وارننگ نے شدید ردِ عمل کو جنم دیا ہے کہ غزہ جنگ کا دائرہ وسیع کرنے سے اسرائیلی قیدیوں کی جانیں خطرے میں پڑ سکتی ہیں۔

اس انتباہ پر اسرائیل کے دو سخت گیر وزرا اتمار بن گویر اور بیزالیل سموتریچ نے شدید غصے کا اظہار کیا، اس اجلاس کے دوران بن گویر نے انتہائی تلخ لہجے میں کہا کہ آج تک کوئی بھی جنگ صرف قیدیوں کی وجہ سے فتح یا شکست سے دوچار نہیں ہوئی۔

مزید پڑھیں:نیتن یاہو اور حماس کے ساتھ اسرائیلی مذاکراتی ٹیم کے درمیان اختلافات میں شدت

واضح رہے کہ صیہونی حکام کی جانب سے صیہونی قیدیوں کے تحفظ سے متعلق غیر ذمہ دارانہ رویے کے باعث اسرائیل کی سڑکوں پر عوام کئی مرتبہ احتجاجی مظاہرے بھی کر چکے ہیں۔