فرانسیسی عوام کی اکثریت امریکہ کو اپنا اتحادی نہیں سمجھتی  

سچ خبریں:فرانسیسی ادارے Elabe کے کی جانب سے کیے جانے والے تازہ ترین سروے کے مطابق، 73 فیصد فرانسیسی عوام کا ماننا ہے کہ واشنگٹن اب پیرس کا اتحادی نہیں رہا۔  

اسپوٹنک نیوز ایجنسی کی رپورٹ کے مطابق، فرانسیسی ادارے Elabe کے ایک حالیہ سروے سے ظاہر ہوتا ہے کہ ملک کی تقریباً تین چوتھائی آبادی امریکہ کو اب فرانس کا اتحادی تصور نہیں کرتی۔

یہ سروے فرانسیسی ریڈیو-ٹی وی نیٹ ورک BFM TV کی درخواست پر کیا گیا، جس میں اسی تناسب کے جواب دہندگان نے امریکی صدر ڈونلڈ ٹرمپ اور ان کے یوکرینی ہم منصب ولودیمیر زیلنسکی کے درمیان وائٹ ہاؤس میں ہونے والی لفظی جھڑپ کو "حیران کن” قرار دیا۔

یہ بھی پڑھیں: میکرون اور پوٹن کی ملاقات پر امریکہ کا پہلا ردعمل

یہ سروے 3 اور 4 مارچ کو 1000 سے زائد فرانسیسی شہریوں کی شمولیت سے منعقد کیا گیا تھا۔

ذرائع کے مطابق، اس جھڑپ کے بعد زیلنسکی اور ان کے وفد کو وائٹ ہاؤس سے باہر نکال دیا گیا، جبکہ کچھ امریکی میڈیا رپورٹس میں یوکرین کے لیے فوجی امداد کی معطلی کی خبر دی گئی ہے۔

اس ملاقات کے دوران، ایک معاہدے پر دستخط ہونا تھے، جس کے تحت یوکرین اپنے نایاب معدنی وسائل کے استحصال کے حقوق امریکہ کو تفویض کرتا۔

ابتداء میں زیلنسکی نے کہا تھا کہ وہ ٹرمپ سے معذرت کرنے کی ضرورت محسوس نہیں کرتے، تاہم جب واشنگٹن نے فوجی امداد روکنے کا اعلان کیا، تو وہ دباؤ میں آگئے۔

مزید پڑھیں: فرانس کی صورتحال اور مغربی ممالک کے انسانی حقوق کے کھوکھلے دعوے

حال ہی میں ایک بیان میں، انہوں نے وائٹ ہاؤس میں پیش آنے والے واقعے پر افسوس کا اظہار کرتے ہوئے کہا کہ وہ امریکہ کے ساتھ معدنی وسائل کے معاہدے پر کسی بھی وقت اور کسی بھی صورت میں دستخط کرنے کے لیے تیار ہیں۔