جرمنی کے بجلی کے نظام پر مسلسل دوسرے روز مشتبہ تخریبی حملہ

?️ 2 ستمبر 2026

سچ خبریں:جرمنی میں کولون کے قریب بجلی کے ایک سب اسٹیشن پر مشتبہ تخریبی کارروائی ہوئی، جبکہ ایک روز قبل برانڈن برگ میں بجلی کی تنصیب کو نشانہ بنایا گیا تھا۔ حکام نے تینوں واقعات کے درمیان تعلق کی تصدیق نہیں کی۔

جرمنی میں بجلی کے نظام پر مسلسل دوسرے روز ایک مشتبہ تخریبی حملہ کیا گیا۔ یہ واقعہ کولون کے قریب پیش آیا، تاہم اس کے باعث علاقے میں بجلی کی مجموعی فراہمی متاثر نہیں ہوئی۔

اناطولیہ کے مطابق جرمن پولیس نے بتایا کہ کولون کے قریب ایک بجلی کے سب اسٹیشن کو تخریبی کارروائی کا نشانہ بنایا گیا ہے۔

پولیس کے ترجمان کے مطابق موجودہ تحقیقات کی روشنی میں یہ واقعہ کسی تکنیکی خرابی کا نتیجہ نہیں تھا بلکہ غالب امکان ہے کہ یہ ایک دانستہ مجرمانہ کارروائی تھی۔

یہ واقعہ منگل کی شام رائن-ارفت کے علاقے میں پیش آیا، جہاں شارٹ سرکٹ کے نتیجے میں بجلی کی ترسیل کی متعدد لائنیں بند ہوگئیں، تاہم علاقے کی عمومی بجلی کی فراہمی معطل نہیں ہوئی۔

بجلی کی ترسیل کرنے والی کمپنی ایمپریون (Amprion) نے بھی رومرشکیرشن کے قریب سب اسٹیشن میں پیش آنے والے واقعے کی تصدیق کی۔ کمپنی کے مطابق متاثرہ بجلی گھر کو بجلی فراہم کرنے والی لائنوں کے آلات کو نقصان پہنچا، تاہم پورے واقعے کے دوران بجلی کے نظام کا استحکام برقرار رہا۔

یہ واقعہ برانڈن برگ میں ایک بڑے بجلی گھر کی تنصیبات کے خلاف ایک اور تخریبی کارروائی کے صرف 1 روز بعد پیش آیا۔ جرمن حکام کے مطابق نامعلوم افراد نے پھینکنے والے آلات کا استعمال کرتے ہوئے ینش والڈے بجلی گھر کے قریب ایک انتہائی بلند وولٹیج لائن میں شارٹ سرکٹ پیدا کیا۔

اسی طرح بدھ کے روز آگسبرگ کے ریلوے اسٹیشن پر بھی ایک دھماکا ہوا، جس کے نتیجے میں کم از کم 2 افراد معمولی زخمی ہوئے۔ دھماکے کی وجہ تاحال معلوم نہیں ہوسکی اور ماہرین دھماکا خیز مواد جائے وقوعہ کا معائنہ کر رہے ہیں۔

پولیس نے ابھی تک ان تینوں واقعات کے درمیان کسی تعلق کی تصدیق نہیں کی ہے، جبکہ ممکنہ ملزمان اور ان کے محرکات کے بارے میں تحقیقات جاری ہیں۔