پینٹاگون کا بجٹ ایندھن کی قیمتوں میں اضافہ کے دباؤ میں

?️ 4 جون 2026

سچ خبریں:امریکی وزارت دفاع پینٹاگون کو ایندھن کی بڑھتی قیمتوں کے باعث شدید مالی دباؤ کا سامنا ہے۔ ای بی سی نیوز کے مطابق جنگی سرگرمیوں اور آپریشنز کے باعث اربوں ڈالر کے اضافی اخراجات سامنے آئے ہیں۔

امریکی نشریاتی ادارے اے بی سی نیوز کی رپورٹ کے مطابق امریکی محکمہ دفاع (پینٹاگون) کو بڑھتے ہوئے غیر متوقع اخراجات، خاص طور پر ایندھن کی قیمتوں میں اضافے کے باعث شدید مالی دباؤ کا سامنا ہے۔

رپورٹ میں محکمہ دفاع کی دستاویزات کے حوالے سے بتایا گیا ہے کہ فوج کی جانب سے خریدے جانے والے ایندھن کی اوسط قیمت اکتوبر میں 154.14 ڈالر فی بیرل سے بڑھ کر اپریل میں 195.72 ڈالر فی بیرل تک پہنچ گئی، جو تقریباً چھ ماہ میں 27 فیصد اضافہ ظاہر کرتی ہے۔

یہ اعداد و شمار تقریباً 24 مختلف اقسام کے ایندھن پر مشتمل ہیں جن میں پٹرول اور جیٹ فیول بھی شامل ہیں۔

رپورٹ کے مطابق جنگ کے دوران عالمی سطح پر ایندھن کی قیمتوں میں اضافے کے باعث اس سال امریکی فوج کو ایک ارب ڈالر سے زائد کے غیر متوقع اخراجات کا سامنا ہو سکتا ہے۔ امریکی فوج سالانہ تقریباً 80 ملین بیرل ایندھن استعمال کرتی ہے۔

مزید بتایا گیا ہے کہ امریکی فوجی حکام کو سول ایوی ایشن کے بڑھتے اخراجات اور تجارتی پروازوں کے ٹکٹوں کی قیمتوں میں اضافے کا بھی سامنا ہے۔ چونکہ فوجی اہلکار تربیت اور دیگر سرگرمیوں کے لیے اکثر تجارتی سفر، کرائے کی گاڑیوں اور ری ایمبرسمنٹ پر انحصار کرتے ہیں، اس لیے یہ اضافہ بجٹ پر مزید دباؤ ڈال رہا ہے۔

ای بی سی نیوز کے مطابق کم از کم اپریل سے بعض فوجی یونٹس نے اخراجات کو کنٹرول کرنے کے لیے تربیتی مشقوں اور دیگر سرگرمیوں میں نمایاں کمی یا انہیں منسوخ کرنا شروع کر دیا ہے۔

امریکی فوج کے ترجمان Orlando Howard نے کہا کہ توانائی کی عالمی مارکیٹ میں تبدیلیوں کے باعث ایندھن کی قیمتوں میں اضافہ ہو رہا ہے، جس کا اثر نقل و حمل، لاجسٹکس اور فوجی سازوسامان پر پڑ سکتا ہے۔

رپورٹ میں مزید بتایا گیا ہے کہ امریکی فوج کو مالی سال کے باقی حصے میں 4 سے 6 ارب ڈالر کے بجٹ خسارے کو پورا کرنے کے لیے بڑے پیمانے پر تربیتی پروگراموں میں کٹوتیاں کرنا پڑ سکتی ہیں۔

یہ خسارہ کئی عوامل کا نتیجہ بتایا گیا ہے، جن میں ایران کے خلاف جنگ، سرحدی آپریشنز میں اضافہ اور واشنگٹن میں نیشنل گارڈ کی مسلسل تعیناتی شامل ہیں۔