شادی سے چند گھنٹے قبل فلسطینی شہری صیہونی درندوں کے ہاتھوں شہید

?️ 6 جون 2026

سچ خبریں:غزہ کے شہر خان یونس میں صہیونی حملے کے دوران ایک فلسطینی شہری اپنی شادی سے چند گھنٹے قبل شہید ہو گیا جبکہ تازہ حملوں میں غزہ بھر میں شدید بمباری اور انسانی بحران میں مزید اضافہ ہوا ہے۔

فلسطینی طبی ذرائع نے اعلان کیا ہے کہ غزہ کی پٹی کے جنوبی شہر خان یونس میں صہیونی حکومت کے حملے کے نتیجے میں ایک فلسطینی شہری شہید ہو گیا، جس کی صرف چند گھنٹے بعد شادی کی تقریب تھی۔

فلسطینی خبر رساں ایجنسی وفا کے مطابق شہید ہونے والے شہری کی شناخت مہند عثمان فروانہ کے نام سے ہوئی ہے، جو ایک خیمے پر کیے گئے حملے میں جان کی بازی ہار گئے۔

رپورٹ کے مطابق یہ واقعہ اس وقت پیش آیا جب ان کی شادی کی تیاری مکمل ہو چکی تھی اور چند ہی گھنٹے بعد تقریب منعقد ہونا تھی۔

مقامی ذرائع نے بتایا کہ خان یونس شہر میں علی الصبح متعدد حملے کیے گئے جن میں کواڈ کاپٹر ڈرونز، ٹینکوں کی گولہ باری، توپ خانے کی شیلنگ اور دھوئیں کے بموں کا استعمال شامل تھا۔

یہ حملے غزہ کی پٹی میں تقریباً روزانہ ہونے والی صہیونی خلاف ورزیوں کا تسلسل ہیں، جو 11 اکتوبر سے نافذ جنگ بندی کے باوجود جاری ہیں۔

رپورٹس کے مطابق گزشتہ تقریباً آٹھ ماہ کے دوران ان حملوں میں 950 کے قریب فلسطینی شہید اور 2930 سے زائد زخمی ہو چکے ہیں۔

اسی دوران قابض حکام جنگ بندی معاہدے کے ابتدائی مرحلے پر عمل درآمد سے گریزاں ہیں، خصوصاً رفح کراسنگ کھولنے اور غزہ میں انسانی امداد و بنیادی ضروریات کی فراہمی میں رکاوٹیں برقرار ہیں، جس کے باعث پہلے سے موجود انسانی بحران مزید سنگین ہو گیا ہے۔