اقوام متحدہ میں فلسطین کے مستقل مندوب نے عالمی برادری پر شدید برہمی کا اظہار کردیا

?️ 26 جولائی 2021

جنیوا (سچ خبریں) اقوام متحدہ میں فلسطین کے مستقل مندوبریاض منصور نے عالمی برادری پر شدید برہمی کا اظہار کرتے ہوئے کہا ہے کہ آج جو اسرائیل اتنا زیادہ بدمعاش اور دہشت گرد بنا ہے اس کی سب سے بڑی وجہ عالمی برادری کی خاموشی ہے۔

تفصیلات کے مطابق اقوام متحدہ میں فلسطین کے مستقل مندوب ریاض منصور نے کہا ہے کہ فلسطینیوں کے بنیادی حقوق کی سنگین پامالیوں اور عالمی قوانین کی خلاف ورزیوں پر اسرائیل کو کھلی چھوٹ دینے اور اس کا مواخذہ نہ کیے جانے کے عالمی طرز عمل نے اسرائیل کو بدمعاش ریاس بنا دیا ہے۔

موصولہ اطلاعات کے مطابق اقوام متحدہ کی قیادت کولکھے گئے مکتوب میں ریاض منصور کا کہنا تھا کہ اسرائیل اقوام متحدہ کے معاہدوں، جنیوا معاہدے اور اقوام متحدہ کی قراردادوں کی کلھم کھلا خلاف ورزی کررہا ہے۔

ان کا کہنا تھا کہ سلامتی کونسل، اقوام متحدہ اور عالمی برادری کی طرف سے اسرائیل کو کھلی چھوٹ دینے کے نتیجے میں اس کے جرائم میں اضافہ ہوا ہے۔

ریاض منصور نے اقوام متحدہ کے سیکرٹری جنرل انتونیو گوٹیرس، سلامتی کونسل کے صدر فرانس، جنرل اسمبلی کے صدر اور دیگر سینیر عہدیداروں کو مکتوب ارسال کیے ہیں۔

ان مکتوبات میں انہوں نے اقوام متحدہ کی قیادت کو فلسطین کی موجودہ صورت حال، القدس میں کشیدگی، عالمی قراردادوں کی سفارتی اور سیاسی اہمیت ان پر عمل درآمد، قضیہ فلسطین کے حل کے حوالے سے بین الاقوامی قوانین پرعمل درآمد اور دیگر امور پر روشنی ڈالی گئی ہے۔

ان کا کہنا ہے کہ اب وقت آگیا ہے کہ عالمی برادری باتوں کے بجائے عملی اقدامات کریں، انہوں نے اسرائیلی ریاست کے مظالم پر خاموشی اختیار کرنے پر افسوس کا اظہار کیا۔

ان کا کہنا تھا کہ عالمی برادری کی مجرمانہ خاموشی نے اسرائیل کو جرائم کی کھلی چھوٹ دے دی  ہے۔