چیٹ جی پی ٹی میں نئی سکیورٹی کمزوری کا انکشاف

?️ 31 مئی 2026

سچ خبریں:ایک سکیورٹی ماہر نے چیٹ جی پی ٹی میں ایسی کمزوری کی نشاندہی کی ہے جس کے ذریعے ہیکرز پوشیدہ ہدایات کے ذریعے فشنگ لنکس اور جعلی سکیورٹی وارننگز شامل کر سکتے ہیں،اوپن اے آئی کو اس خطرے سے آگاہ کر دیا گیا ہے۔

ایک سکیورٹی محقق نے دعویٰ کیا ہے کہ چیٹ جی پی ٹی ایسے مواد میں فرق کرنے میں مشکل محسوس کرتا ہے جو اس نے خود تیار کیا ہو اور وہ مواد جو مارک ڈاؤن زبان میں بیرونی ذرائع سے ہیکرز کے کنٹرول میں ہو کر شامل کیا گیا ہو۔

رجسٹر نیوز ایجنسی کی رپورٹ کے مطابق ایک سکیورٹی ماہر نے مصنوعی ذہانت کے چیٹ بوٹس میں پرومپٹ انجیکشن نامی حملے کا نیا طریقہ دریافت کیا ہے اور اس خطرے سے اوپن اے آئی کو آگاہ کر دیا ہے۔

رپورٹ میں بتایا گیا ہے کہ اگر کسی صارف سے کہا جائے کہ وہ ایسی ویب سائٹ کا خلاصہ تیار کرے جس میں خفیہ ہدایات شامل ہوں تو وہ ویب صفحہ چیٹ بوٹ کو نقصان دہ ہدایات پر عمل کرنے پر مجبور کر سکتا ہے۔

 اس صورتحال میں حملہ آور چیٹ بوٹ کے اعتماد سے فائدہ اٹھا کر فشنگ لنکس شامل کر سکتا ہے یا اسے جعلی سکیورٹی وارننگز دکھانے پر مجبور کر سکتا ہے جو اصل چیٹ جی پی ٹی پیغامات جیسے نظر آتے ہیں۔

محقق اینڈی احمتی نے یہ بھی دکھایا ہے کہ سائبر مجرم کس طرح کیو آر کوڈز کے ذریعے حملے کو براؤزر سے صارف کے موبائل فون تک منتقل کر سکتے ہیں۔ اس طریقے میں متاثرہ شخص کیو آر کوڈ اسکین کر کے ایسے مواد تک پہنچیٹا ہے جو حملہ آور کے زیر کنٹرول ایس تھری اسٹوریج میں موجود ہوتا ہے۔

 اس سے ہیکرز کو مختلف حفاظتی نظاموں کو بائی پاس کرنے کا موقع مل جاتا ہے جن میں یو آر ایل بلاک لسٹ اور پاس ورڈ مینیجرز کے ڈومین چیکنگ سسٹمز شامل ہیں۔

اینڈی احمتی کے مطابق مصنوعی ذہانت کے نظام تیزی سے غیر تصدیق شدہ مواد کو براہ راست صارف کے براؤزر میں پیش کر رہے ہیں، جس سے خطرات کی سطح نمایاں طور پر بڑھ گئی ہے۔

انہوں نے مزید کہا کہ سب سے بڑا مسئلہ یہ ہے کہ مصنوعی ذہانت کی مصنوعات آہستہ آہستہ براؤزر یا حتیٰ کہ آپریٹنگ سسٹم جیسے ماحول کی شکل اختیار کر رہی ہیں، جس سے حملوں اور سکیورٹی خطرات میں مزید اضافہ ہو رہا ہے۔

تاہم ابھی یہ واضح نہیں ہے کہ آیا اس سکیورٹی کمزوری کو مکمل طور پر درست کیا گیا ہے یا نہیں۔