لبنانی صدر کے الحشد الشعبی مخالف بیان پر عراق کا شدید ردعمل

سچ خبریں:عراقی وزارت خارجہ نے لبنانی صدر کے الحشد الشعبی مخالف بیان پر اپناتے ہوئے کہا کہ الحشد الشعبی ریاستی ادارہ ہے، لبنان کو داخلی معاملات میں مداخلت سے گریز کرنا چاہیے

لبنانی صدر جوزف عون کی جانب سے عراق کی نیم سرکاری عسکری تنظیم حشد الشعبی پر تنقیدی بیان دینے پر عراقی حکومت نے سخت ردعمل دیا ہے اور لبنانی سفیر علی الحبحاب کو وزارت خارجہ میں طلب کر کے باضابطہ احتجاج ریکارڈ کروایا ہے۔

یہ بھی پڑھیں: ہتھیار کے بدلے الحشد الشعبی منحل کرنے کا مطالبہ،وجہ؟

عراقی خبررساں ایجنسی واع کی رپورٹ کے مطابق اس ملک کی وزارت خارجہ نے اپنے بیان میں کہا کہ ہم نے لبنانی سفیر کو طلب کر کے صدر جوزف عون کے بیان پر شدید ناپسندیدگی کا اظہار کیا ہے،یہ بیان غیر موزوں، غیر ضروری اور دو طرفہ تعلقات کو متاثر کرنے والا ہے۔

عراقی نائب وزیر خارجہ محمد حسین بحرالعلوم نے واضح کیا کہ الحشد الشعبی، عراق کی سیکیورٹی اسٹرکچر کا ایک اہم ریاستی اور قانونی حصہ ہے،اسے کسی بھی طور پر لبنان کے داخلی بحران یا حزب اللہ جیسے معاملات سے جوڑنا نامناسب اور غیر سفارتی عمل ہے۔

انہوں نے مزید کہا کہ لبنانی صدر کو چاہیے تھا کہ عراق کو لبنان کے داخلی معاملات میں نہ گھسیٹتے، خاص طور پر جب کہ عراق نے ہمیشہ لبنان کی مشکل گھڑیوں میں حمایت کی ہے۔

بحرالعلوم نے امید ظاہر کی کہ لبنانی صدر اپنے بیان پر نظرثانی کریں گے تاکہ برادرانہ تعلقات میں خلل نہ آئے، دوسری جانب، لبنانی سفیر علی الحبحاب نے دونوں ممالک کے گہرے اور تاریخی تعلقات پر زور دیتے ہوئے وعدہ کیا کہ وہ عراقی وزارت خارجہ کی شکایت کو لبنانی صدر تک پہنچائیں گے۔

واضح رہے کہ لبنانی صدر جوزف عون نے العربی الجدید کو دیے گئے ایک انٹرویو میں کہا تھا کہ میں واضح طور پر کہتا ہوں کہ عراق میں الحشد الشعبی کا ماڈل لبنان میں ہرگز نہیں دہرایا جائے گا، حزب اللہ کے افراد، اگر لبنانی فوج میں شامل ہونا چاہتے ہیں، تو انہیں وہی قانونی امتحانات، تربیت اور اہلیت مکمل کرنی ہوگی جو دیگر اہلکاروں کے لیے ضروری ہے۔

مزید پڑھیں: الحشد الشعبی عراق کی خودمختاری اور استحکام کی حامی

یہ بیان عراق میں سخت ناراضگی کا سبب بنا ہے، جہاں الحشد الشعبی کو داعش کے خلاف جنگ میں کلیدی کردار ادا کرنے والے ادارے کے طور پر دیکھا جاتا ہے۔