سوڈان کے صدارتی محل کے قریب شدید جھڑپیں، کئی علاقوں پر فوج کا کنٹرول

سچ خبریں:سوڈان کے دارالحکومت خرطوم میں واقع صدارتی محل کے قریب فوج اور ریپڈ سپورٹ فورسز (RSF) کے درمیان شدید جھڑپوں کی اطلاعات ہیں۔ 

الجزیرہ نیوز چینل کی رپورٹ کے مطابق  عینی شاہدین نے بتایا ہے کہ سوڈان کے دارالحکومت خرطوم میں فوج اور ریپڈ سپورٹ فورسز (RSF) کے درمیان لڑائی میں شدت آئی ہے اور مختلف علاقوں میں گولہ باری کی آوازیں سنی گئی ہیں۔

یہ بھی پڑھیں: سوڈان میں رپیڈ ایکشن ملیشیا کا ہولناک جرم

ذرائع کا کہنا ہے کہ سوڈانی فوج نے مشرقی ریاست سنار کے ایک اہم شہر پر دوبارہ کنٹرول حاصل کرلیا ہے، دوسری جانب، فوج نے خرطوم کے وسطی علاقے میں سرکاری دفاتر اور صدارتی محل کی طرف پیش قدمی تیز کردی ہے۔

گزشتہ دنوں سے خرطوم میں جھڑپیں مزید شدید ہو گئی ہیں، کیونکہ فوج ان علاقوں پر دباؤ بڑھا رہی ہے جو اب بھی ریپڈ سپورٹ فورسز کے قبضے میں ہیں۔

یاد  رہے کہ ستمبر 2023 سے شروع ہونے والی فوجی کارروائی کے نتیجے میں RSF کی گرفت کمزور ہوئی ہے، اور اس گروہ کو ریاست الجزیرہ میں بھی بھاری نقصان اٹھانا پڑا ہے۔

سوڈان کے دوسرے بڑے شہر ام درمان میں مارٹر شیل گرنے کے باعث شدید دھماکے ہوئے جہاں ابتدائی اطلاعات کے مطابق، ایک بچے کی ہلاکت اور سات افراد کے زخمی ہونے کی تصدیق ہوئی ہے۔

مغربی سوڈان کے علاقے دارفور میں بھی جھڑپیں جاری ہیں، شمالی دارفور کے شہر فاشر میں ابو شوق پناہ گزین کیمپ کو آج صبح RSF نے بمباری کا نشانہ بنایا جس کے نتیجے میں کم از کم 6 شہری ہلاک اور متعدد زخمی ہوگئے۔

سوڈانی فوج کا کہنا ہے کہ اس کے دستے شمالی دارفور کے مرکز میں اپنی پیش قدمی جاری رکھے ہوئے ہیں اور مزید اہم کامیابیاں حاصل کر رہے ہیں۔

مزید پڑھیں: جنوبی سوڈان میں انتخابات ایک بار پھر ملتوی

سوڈان میں اپریل 2023 سے جاری خانہ جنگی میں اب تک کم از کم 20 ہزار افراد ہلاک اور 1 کروڑ 40 لاکھ سے زائد بے گھر ہوچکے ہیں۔ یہ تنازعہ فوج اور RSF کے درمیان جاری اقتدار کی کشمکش کے نتیجے میں پیدا ہوا جس نے ملک کو شدید انسانی بحران میں مبتلا کر دیا ہے۔