آباکاروں کی دہشتگردی کو روکو؛سابق صیہونی عہدیداروں کا نیتن یاہو کو انتباہ

?️ 19 جون 2026

سچ خبریں:اسرائیل کے سابق وزرائے اعظم اور سکیورٹی حکام نے نیتن یاہو کو خط لکھ کر مغربی کنارے میں یہودی آبادکاروں کے تشدد کو روکنے کے لیے فوری حکومتی اقدامات کا مطالبہ کیا ہے۔

صیہونی حکومت کے سابق سیاسی، سکیورٹی اور فوجی حکام کی ایک بڑی تعداد نے وزیر اعظم کو ایک خط لکھ کر مقبوضہ مغربی کنارے میں یہودی شدت پسندانہ سرگرمیوں کے خلاف فوری کارروائی کا مطالبہ کیا ہے۔

فلسطین الیوم کے مطابق اس خط میں دو سابق وزرائے اعظم، سابق سکیورٹی اداروں کے سربراہان اور درجنوں ریٹائرڈ حکام نے دستخط کیے ہیں۔

خط میں خبردار کیا گیا ہے کہ انتہا پسند آبادکاروں کی جانب سے فلسطینیوں پر حملوں میں اضافہ انتہائی خطرناک صورتحال پیدا کر رہا ہے اور اس کے فوری خاتمے کے لیے حکومت کو عملی اقدامات کرنے چاہییں۔

دستخط کرنے والوں نے کہا ہے کہ حالیہ حملوں کے نتیجے میں فلسطینی شہری جاں بحق اور زخمی ہوئے ہیں، املاک کو نقصان پہنچا ہے اور مقامی آبادی کو جبری طور پر بے دخل کرنے کے دباؤ میں اضافہ ہوا ہے۔

انہوں نے نیتن یاہو حکومت کے اس مؤقف کو مسترد کر دیا کہ یہ واقعات صرف چند نوجوانوں تک محدود ہیں جنہیں “ہل ٹاپ یوتھ” کہا جاتا ہے۔ خط میں ان کارروائیوں کو منظم تشدد قرار دیا گیا ہے۔

خط میں مطالبہ کیا گیا ہے کہ ان حملوں میں ملوث افراد کو مغربی کنارے سے نکالا جائے اور ان کے خلاف قانونی کارروائی کی جائے۔ ساتھ ہی خبردار کیا گیا ہے کہ اگر یہ صورتحال جاری رہی تو معاملہ قانونی اور عدالتی سطح پر لے جایا جائے گا۔

دستخط کرنے والوں میں میں ایہود باراک، ایہود اولمرت، موشے یعلون، دان ہالوتس سمیت اسرائیل کے سابق سکیورٹی اداروں کے متعدد سربراہان شامل ہیں۔

رپورٹ کے مطابق حالیہ ہفتوں میں صہیونی آبادکاروں نے مغربی کنارے کے مختلف علاقوں میں فلسطینی آبادی پر منظم حملے کیے ہیں جن میں املاک کی تباہی، گھروں اور گاڑیوں کو نذر آتش کرنے اور شہریوں کے قتل کے واقعات شامل ہیں۔