واشنگٹن (سچ خبریں) سابق امریکی خاتون اول مشیل اوباما نے میگھن مارکل کے انٹرویو کے حوالے سے اہم بیان جاری کرتے ہوئے کہا ہے کہ ان کا انٹرویو دل دہلا دینے والا تھا لیکن شاہی خاندان میں یہ سب چیزیں معمول کی بات ہیں وہاں تعصب اور نسل پرستی ہوتی رہتی ہے۔
تفصیلات کے مطابق سابق امریکی خاتون اول مشیل اوباما کا میگھن مارکل کے شاہی خاندان پر نسلی تعصب کے الزامات کے حوالے سے کہا ہے کہ میگھن کا انٹرویو دل دہلا دینے والا تھا لیکن شاہی خاندان پر نسل پرستی کے الزامات میرے لیے حیران کن نہیں۔
غیرملکی میڈیا رپورٹس کے مطابق مشیل اوباما نے اپنے خیالات کا اظہار کرتے ہوئے خاندان کی اہمیت کو اجاگر کیا، انہوں نے کہا کہ انسان کیلئے سب سے اہم فیملی ہوتی ہے۔
انہوں نے ہیری اور میگھن کیلئے دعا کرتے ہوئے کہا کہ میں ان دونوں کو اس مشکل وقت میں آسانی کی دعا کرتی ہوں اور دونوں کیلئے درگزر کا مشورہ ہے۔
مشل اوباما نے اپنی نیک خواہشات کا اظہار کرتے ہوئے یہ بھی کہا کہ وہ پرامید ہیں کہ شاہی جوڑا شاہی خاندان سے اپنے تعلقات کو بحال کرنے کے لیے کوئی راستہ ضرور ڈھونڈے گا۔
دوسری جانب سابق امریکی صدر باراک اوباما بھی میگھن کے طویل مدت سے حامی ہیں، اوباما نے 2019 میں اپنی ایک انسٹاگرام پوسٹ میں میگھن کو اپنی دوست اور سوچ بچار کرنے والی رہنما کہا تھا۔
واضح رہے کہ شاہی محل نے نسلی تعصب پر ردعمل میں کہا تھا کہ یہ دعویٰ پریشان کن ہے لیکن معاملے کو نجی طور پر ہی حل کیا جائے گا۔
دوسری جانب ملکہ برطانیہ شاہی خاندان چھوڑ کر ہیری میگھن کے امریکا منتقل ہونے سے متعلق سمجھوتے کی طے شرائط تبدیل نہیں کریں گی۔
برطانوی میڈیا کا کہنا ہے کہ ملکہ جو کہہ دیتی ہیں اسے بدلتی نہیں۔
علاوہ ازیں بکھنگم پیلس نے مارکل کے بارے میں الزامات کی تحقیقات کے لیے آزاد تفتیش کاروں کی خدمات لینے کا فیصلہ کیا ہے۔
ادھر ناراض بہو میگھن نے شاہی عملےکو تنگ کرنے سے متعلق الزامات کے بارے میں ای میلز اور میسیجز کا ریکارڈ مانگ لیا۔
