افغانستان میں عسکریت پسندوں پر متعدد فضائی حملے، درجنوں افراد ہلاک اور زخمی ہوگئے

کابل (سچ خبریں) افغانستان میں سیکیورٹی فورسز  نے عسکریت پسندوں پر متعدد فضائی حملے کردیئے جس کے نتیجے میں درجنوں افراد ہلاک اور زخمی ہوگئے ہیں۔

تفصیلات کے مطابق افغانستان میں افغان سیکیورٹی فورسز فضائی حملوں کے دوران 15 افراد جاں بحق اور متعدد زخمی ہوگئے ہیں ۔

چینی خبر رساں ادارے کے مطابق افغان سیکیورٹی فورسز کے ترجمان محمد حنیف زائی نے کہا ہے کہ شمالی صوبہ فریاب کے ضلع المار میں جمعرات کو جنگجو طیاروں نے عسکریت پسندوں کے ایک اجتماع کو نشانہ بنایا جس کے نتیجے میں 15 عسکریت پسند ہلاک جبکہ 3 زخمی ہو گئے ہیں۔

ترجمان نے بتایاکہ فضائی حملوں کے دوران سیکیورٹی اہلکاروں اور عام شہریوں کا کوئی جانی نقصان نہیں ہوا ۔

رپورٹ کے مطابق سیکیورٹی فورسز صوبہ فریاب کے ضلع المار اور ارد گرد کے علاقوں میں امن واستحکام کویقینی بنانے کے لیے مزید کارروائی جاری رکھیں گی۔

افغان سیکیورٹی فورسز کے فضائی حملوں کے فوری بعد عسکریت پسندوں کی جانب سے کوئی اطلاع موصول نہیں ہوئی۔

واضح رہے کہ امریکا کی جانب سے افغانستان میں امن معاہدے کی خلاف ورزی کے بعد طالبان نے افغانستان میں اپنے حملے تیز کردیئے ہیں جبکہ امریکا نے افغانستان میں ایک نیا کھیل کھیلتے ہوئے اس بات کا اعلان کیا ہے کہ افغانستان کی موجودہ حکومت کا ختم کرکے ایک نگراں حکومت بنائی جائے جو نئے انتخابات تک ملک کا اقتدار سنبہالے اور اس کے بعد جو بھی جماعت انتخابات جیت جائے اسے حکومت دے دی جائے۔